Leviticus 26:1 Cross References - HOT

¹ לא תעשׂו לכם אלילם ופסל ומצבה לא תקימו לכם ואבן משׂכית לא תתנו בארצכם להשׁתחות עליה כי אני יהוה אלהיכם׃

Exodus 20:4-5

⁴ לא תעשׂה לך פסל וכל תמונה אשׁר בשׁמים ממעל ואשׁר בארץ מתחת ואשׁר במים מתחת לארץ׃⁵ לא תשׁתחוה להם ולא תעבדם כי אנכי יהוה אלהיך אל קנא פקד עון אבת על בנים על שׁלשׁים ועל רבעים לשׂנאי׃

Exodus 20:23

²³ לא תעשׂון אתי אלהי כסף ואלהי זהב לא תעשׂו׃

Exodus 23:24

²⁴ לא תשׁתחוה לאלהיהם ולא תעבדם ולא תעשׂה כמעשׂיהם כי הרס תהרסם ושׁבר תשׁבר מצבתיהם׃

Leviticus 19:4

⁴ אל תפנו אל האלילם ואלהי מסכה לא תעשׂו לכם אני יהוה אלהיכם׃

Numbers 33:52

⁵² והורשׁתם את כל ישׁבי הארץ מפניכם ואבדתם את כל משׂכיתם ואת כל צלמי מסכתם תאבדו ואת כל במותם תשׁמידו׃

¹⁶ פן תשׁחתון ועשׂיתם לכם פסל תמונת כל סמל תבנית זכר או נקבה׃¹⁷ תבנית כל בהמה אשׁר בארץ תבנית כל צפור כנף אשׁר תעוף בשׁמים׃¹⁸ תבנית כל רמשׂ באדמה תבנית כל דגה אשׁר במים מתחת לארץ׃¹⁹ ופן תשׂא עיניך השׁמימה וראית את השׁמשׁ ואת הירח ואת הכוכבים כל צבא השׁמים ונדחת והשׁתחוית להם ועבדתם אשׁר חלק יהוה אלהיך אתם לכל העמים תחת כל השׁמים׃

Deuteronomy 5:8-9

⁸ לא תעשׂה לך פסל כל תמונה אשׁר בשׁמים ממעל ואשׁר בארץ מתחת ואשׁר במים מתחת לארץ׃⁹ לא תשׁתחוה להם ולא תעבדם כי אנכי יהוה אלהיך אל קנא פקד עון אבות על בנים ועל שׁלשׁים ועל רבעים לשׂנאי׃

Deuteronomy 16:21-22

²¹ לא תטע לך אשׁרה כל עץ אצל מזבח יהוה אלהיך אשׁר תעשׂה׃²² ולא תקים לך מצבה אשׁר שׂנא יהוה אלהיך׃

Deuteronomy 27:15

¹⁵ ארור האישׁ אשׁר יעשׂה פסל ומסכה תועבת יהוה מעשׂה ידי חרשׁ ושׂם בסתר וענו כל העם ואמרו אמן׃

Psalms 97:7

⁷ יבשׁו כל עבדי פסל המתהללים באלילים השׁתחוו לו כל אלהים׃

Psalms 115:4-8

⁴ עצביהם כסף וזהב מעשׂה ידי אדם׃⁵ פה להם ולא ידברו עינים להם ולא יראו׃⁶ אזנים להם ולא ישׁמעו אף להם ולא יריחון׃⁷ ידיהם ולא ימישׁון רגליהם ולא יהלכו לא יהגו בגרונם׃⁸ כמוהם יהיו עשׂיהם כל אשׁר בטח׃

Isaiah 2:20

²⁰ ביום ההוא ישׁליך האדם את אלילי כספו ואת אלילי זהבו אשׁר עשׂו לו להשׁתחות לחפר פרות ולעטלפים׃

Isaiah 44:9-20

⁹ יצרי פסל כלם תהו וחמודיהם בל יועילו ועדיהם המה בל יראו ובל ידעו למען יבשׁו׃¹⁰ מי יצר אל ופסל נסך לבלתי הועיל׃¹¹ הן כל חבריו יבשׁו וחרשׁים המה מאדם יתקבצו כלם יעמדו יפחדו יבשׁו יחד׃¹² חרשׁ ברזל מעצד ופעל בפחם ובמקבות יצרהו ויפעלהו בזרוע כחו גם רעב ואין כח לא שׁתה מים וייעף׃¹³ חרשׁ עצים נטה קו יתארהו בשׂרד יעשׂהו במקצעות ובמחוגה יתארהו ויעשׂהו כתבנית אישׁ כתפארת אדם לשׁבת בית׃¹⁴ לכרת לו ארזים ויקח תרזה ואלון ויאמץ לו בעצי יער נטע ארן וגשׁם יגדל׃¹⁵ והיה לאדם לבער ויקח מהם ויחם אף ישׂיק ואפה לחם אף יפעל אל וישׁתחו עשׂהו פסל ויסגד׃¹⁶ חציו שׂרף במו אשׁ על חציו בשׂר יאכל יצלה צלי וישׂבע אף יחם ויאמר האח חמותי ראיתי אור׃¹⁷ ושׁאריתו לאל עשׂה לפסלו יסגוד לו וישׁתחו ויתפלל אליו ויאמר הצילני כי אלי אתה׃¹⁸ לא ידעו ולא יבינו כי טח מראות עיניהם מהשׂכיל לבתם׃¹⁹ ולא ישׁיב אל לבו ולא דעת ולא תבונה לאמר חציו שׂרפתי במו אשׁ ואף אפיתי על גחליו לחם אצלה בשׂר ואכל ויתרו לתועבה אעשׂה לבול עץ אסגוד׃²⁰ רעה אפר לב הותל הטהו ולא יציל את נפשׁו ולא יאמר הלוא שׁקר בימיני׃

Isaiah 48:5-8

⁵ ואגיד לך מאז בטרם תבוא השׁמעתיך פן תאמר עצבי עשׂם ופסלי ונסכי צום׃⁶ שׁמעת חזה כלה ואתם הלוא תגידו השׁמעתיך חדשׁות מעתה ונצרות ולא ידעתם׃⁷ עתה נבראו ולא מאז ולפני יום ולא שׁמעתם פן תאמר הנה ידעתין׃⁸ גם לא שׁמעת גם לא ידעת גם מאז לא פתחה אזנך כי ידעתי בגוד תבגוד ופשׁע מבטן קרא׃

Jeremiah 10:3-8

³ כי חקות העמים הבל הוא כי עץ מיער כרתו מעשׂה ידי חרשׁ במעצד׃⁴ בכסף ובזהב ייפהו במסמרות ובמקבות יחזקום ולוא יפיק׃⁵ כתמר מקשׁה המה ולא ידברו נשׂוא ינשׂוא כי לא יצעדו אל תיראו מהם כי לא ירעו וגם היטיב אין אותם׃⁶ מאין כמוך יהוה גדול אתה וגדול שׁמך בגבורה׃⁷ מי לא יראך מלך הגוים כי לך יאתה כי בכל חכמי הגוים ובכל מלכותם מאין כמוך׃⁸ ובאחת יבערו ויכסלו מוסר הבלים עץ הוא׃