Psalms 92

Vulgate^{(i) 1} psalmus cantici in die sabbati bonum est confiteri Domino et psallere nomini tuo Altissime ² ad adnuntiandam mane misericordiam tuam et fidem tuam in nocte ³ in decacordo et in psalterio in cantico in cithara ⁴ quoniam laetificasti me Domine in opere tuo in facturis manuum tuarum laudabo ⁵ quam magnificata sunt opera tua Domine satis profundae factae sunt cogitationes tuae ⁶ vir insipiens non cognoscet et stultus non intelleget istud ⁷ germinaverunt impii quasi faenum et floruerunt omnes qui operantur iniquitatem ut contererentur usque in sempiternum ⁸ tu autem Excelsus in aeternum Domine ⁹ ecce enim inimici tui Domine ecce inimici tui peribunt et dissipabuntur omnes qui operantur iniquitatem ¹⁰ et exaltabitur quasi monocerotis cornu meum et senecta mea in oleo uberi ¹¹ et dispiciet oculus meus eos qui insidiantur mihi de his qui consurgunt adversum me malignantibus audit auris mea ¹² iustus ut palma florebit ut cedrus in Libano multiplicabitur ¹³ transplantati in domo Domini in atriis Dei nostri germinabunt ¹⁴ adhuc fructificabunt in senectute pingues et frondentes erunt ¹⁵ adnuntiantes quia rectus Dominus fortitudo mea et non est iniquitas in eo