HOT(i)
1 למנצח מזמור לדוד׃ (140:2) חלצני יהוה מאדם רע מאישׁ חמסים תנצרני׃ 2 (140:3) אשׁר חשׁבו רעות בלב כל יום יגורו מלחמות׃ 3 (140:4) שׁננו לשׁונם כמו נחשׁ חמת עכשׁוב תחת שׂפתימו סלה׃ 4 (140:5) שׁמרני יהוה מידי רשׁע מאישׁ חמסים תנצרני אשׁר חשׁבו לדחות פעמי׃ 5 (140:6) טמנו גאים פח לי וחבלים פרשׂו רשׁת ליד מעגל מקשׁים שׁתו לי סלה׃ 6 (140:7) אמרתי ליהוה אלי אתה האזינה יהוה קול תחנוני׃ 7 (140:8) יהוה אדני עז ישׁועתי סכתה לראשׁי ביום נשׁק׃ 8 (140:9) אל תתן יהוה מאויי רשׁע זממו אל תפק ירומו סלה׃ 9 (140:10) ראשׁ מסבי עמל שׂפתימו יכסומו׃ 10 (140:11) ימיטו עליהם גחלים באשׁ יפלם במהמרות בל יקומו׃ 11 (140:12) אישׁ לשׁון בל יכון בארץ אישׁ חמס רע יצודנו למדחפת׃ 12 (140:13) ידעת כי יעשׂה יהוה דין עני משׁפט אבינים׃ 13 (140:14) אך צדיקים יודו לשׁמך ישׁבו ישׁרים את פניך׃