Psalms 119 אשׁרי תמימי דרך ההלכים בתורת יהוה׃

HOT⁽ⁱ⁾ ¹ אשׁרי תמימי דרך ההלכים בתורת יהוה׃ ² אשׁרי נצרי עדתיו בכל לב ידרשׁוהו׃ ³ אף לא פעלו עולה בדרכיו הלכו׃ ⁴ אתה צויתה פקדיך לשׁמר מאד׃ ⁵ אחלי יכנו דרכי לשׁמר חקיך׃ ⁶ אז לא אבושׁ בהביטי אל כל מצותיך׃ ⁷ אודך בישׁר לבב בלמדי משׁפטי צדקך׃ ⁸ את חקיך אשׁמר אל תעזבני עד מאד׃ ⁹ במה יזכה נער את ארחו לשׁמר כדברך׃ ¹⁰ בכל לבי דרשׁתיך אל תשׁגני ממצותיך׃ ¹¹ בלבי צפנתי אמרתך למען לא אחטא׃ ¹² ברוך אתה יהוה למדני חקיך׃ ¹³ בשׂפתי ספרתי כל משׁפטי פיך׃ ¹⁴ בדרך עדותיך שׂשׂתי כעל כל הון׃ ¹⁵ בפקדיך אשׂיחה ואביטה ארחתיך׃ ¹⁶ בחקתיך אשׁתעשׁע לא אשׁכח דברך׃ ¹⁷ גמל על עבדך אחיה ואשׁמרה דברך׃ ¹⁸ גל עיני ואביטה נפלאות מתורתך׃ ¹⁹ גר אנכי בארץ אל תסתר ממני מצותיך׃ ²⁰ גרסה נפשׁי לתאבה אל משׁפטיך בכל עת׃ ²¹ גערת זדים ארורים השׁגים ממצותיך׃ ²² גל מעלי חרפה ובוז כי עדתיך נצרתי׃ ²³ גם ישׁבו שׂרים בי נדברו עבדך ישׂיח בחקיך׃ ²⁴ גם עדתיך שׁעשׁעי אנשׁי עצתי׃ ²⁵ דבקה לעפר נפשׁי חיני כדברך׃ ²⁶ דרכי ספרתי ותענני למדני חקיך׃ ²⁷ דרך פקודיך הבינני ואשׂיחה בנפלאותיך׃ ²⁸ דלפה נפשׁי מתוגה קימני כדברך׃ ²⁹ דרך שׁקר הסר ממני ותורתך חנני׃ ³⁰ דרך אמונה בחרתי משׁפטיך שׁויתי׃ ³¹ דבקתי בעדותיך יהוה אל תבישׁני׃ ³² דרך מצותיך ארוץ כי תרחיב לבי׃ ³³ הורני יהוה דרך חקיך ואצרנה עקב׃ ³⁴ הבינני ואצרה תורתך ואשׁמרנה בכל לב׃ ³⁵ הדריכני בנתיב מצותיך כי בו חפצתי׃ ³⁶ הט לבי אל עדותיך ואל אל בצע׃ ³⁷ העבר עיני מראות שׁוא בדרכך חיני׃ ³⁸ הקם לעבדך אמרתך אשׁר ליראתך׃ ³⁹ העבר חרפתי אשׁר יגרתי כי משׁפטיך טובים׃ ⁴⁰ הנה תאבתי לפקדיך בצדקתך חיני׃ ⁴¹ ויבאני חסדך יהוה תשׁועתך כאמרתך׃ ⁴² ואענה חרפי דבר כי בטחתי בדברך׃ ⁴³ ואל תצל מפי דבר אמת עד מאד כי למשׁפטך יחלתי׃ ⁴⁴ ואשׁמרה תורתך תמיד לעולם ועד׃ ⁴⁵ ואתהלכה ברחבה כי פקדיך דרשׁתי׃ ⁴⁶ ואדברה בעדתיך נגד מלכים ולא אבושׁ׃ ⁴⁷ ואשׁתעשׁע במצותיך אשׁר אהבתי׃ ⁴⁸ ואשׂא כפי אל מצותיך אשׁר אהבתי ואשׂיחה בחקיך׃ ⁴⁹ זכר דבר לעבדך על אשׁר יחלתני׃ ⁵⁰ זאת נחמתי בעניי כי אמרתך חיתני׃ ⁵¹ זדים הליצני עד מאד מתורתך לא נטיתי׃ ⁵² זכרתי משׁפטיך מעולם יהוה ואתנחם׃ ⁵³ זלעפה אחזתני מרשׁעים עזבי תורתך׃ ⁵⁴ זמרות היו לי חקיך בבית מגורי׃ ⁵⁵ זכרתי בלילה שׁמך יהוה ואשׁמרה תורתך׃ ⁵⁶ זאת היתה לי כי פקדיך נצרתי׃ ⁵⁷ חלקי יהוה אמרתי לשׁמר דבריך׃ ⁵⁸ חליתי פניך בכל לב חנני כאמרתך׃ ⁵⁹ חשׁבתי דרכי ואשׁיבה רגלי אל עדתיך׃ ⁶⁰ חשׁתי ולא התמהמהתי לשׁמר מצותיך׃ ⁶¹ חבלי רשׁעים עודני תורתך לא שׁכחתי׃ ⁶² חצות לילה אקום להודות לך על משׁפטי צדקך׃ ⁶³ חבר אני לכל אשׁר יראוך ולשׁמרי פקודיך׃ ⁶⁴ חסדך יהוה מלאה הארץ חקיך למדני׃ ⁶⁵ טוב עשׂית עם עבדך יהוה כדברך׃ ⁶⁶ טוב טעם ודעת למדני כי במצותיך האמנתי׃ ⁶⁷ טרם אענה אני שׁגג ועתה אמרתך שׁמרתי׃ ⁶⁸ טוב אתה ומטיב למדני חקיך׃ ⁶⁹ טפלו עלי שׁקר זדים אני בכל לב אצר פקודיך׃ ⁷⁰ טפשׁ כחלב לבם אני תורתך שׁעשׁעתי׃ ⁷¹ טוב לי כי עניתי למען אלמד חקיך׃ ⁷² טוב לי תורת פיך מאלפי זהב וכסף׃ ⁷³ ידיך עשׂוני ויכוננוני הבינני ואלמדה מצותיך׃ ⁷⁴ יראיך יראוני וישׂמחו כי לדברך יחלתי׃ ⁷⁵ ידעתי יהוה כי צדק משׁפטיך ואמונה עניתני׃ ⁷⁶ יהי נא חסדך לנחמני כאמרתך לעבדך׃ ⁷⁷ יבאוני רחמיך ואחיה כי תורתך שׁעשׁעי׃ ⁷⁸ יבשׁו זדים כי שׁקר עותוני אני אשׂיח בפקודיך׃ ⁷⁹ ישׁובו לי יראיך וידעו עדתיך׃ ⁸⁰ יהי לבי תמים בחקיך למען לא אבושׁ׃ ⁸¹ כלתה לתשׁועתך נפשׁי לדברך יחלתי׃ ⁸² כלו עיני לאמרתך לאמר מתי תנחמני׃ ⁸³ כי הייתי כנאד בקיטור חקיך לא שׁכחתי׃ ⁸⁴ כמה ימי עבדך מתי תעשׂה ברדפי משׁפט׃ ⁸⁵ כרו לי זדים שׁיחות אשׁר לא כתורתך׃ ⁸⁶ כל מצותיך אמונה שׁקר רדפוני עזרני׃ ⁸⁷ כמעט כלוני בארץ ואני לא עזבתי פקודיך׃ ⁸⁸ כחסדך חיני ואשׁמרה עדות פיך׃ ⁸⁹ לעולם יהוה דברך נצב בשׁמים׃ ⁹⁰ לדר ודר אמונתך כוננת ארץ ותעמד׃ ⁹¹ למשׁפטיך עמדו היום כי הכל עבדיך׃ ⁹² לולי תורתך שׁעשׁעי אז אבדתי בעניי׃ ⁹³ לעולם לא אשׁכח פקודיך כי בם חייתני׃ ⁹⁴ לך אני הושׁיעני כי פקודיך דרשׁתי׃ ⁹⁵ לי קוו רשׁעים לאבדני עדתיך אתבונן׃ ⁹⁶ לכל תכלה ראיתי קץ רחבה מצותך מאד׃ ⁹⁷ מה אהבתי תורתך כל היום היא שׂיחתי׃ ⁹⁸ מאיבי תחכמני מצותך כי לעולם היא׃ ⁹⁹ מכל מלמדי השׂכלתי כי עדותיך שׂיחה׃ ¹⁰⁰ מזקנים אתבונן כי פקודיך נצרתי׃ ¹⁰¹ מכל ארח רע כלאתי רגלי למען אשׁמר דברך׃ ¹⁰² ממשׁפטיך לא סרתי כי אתה הורתני׃ ¹⁰³ מה נמלצו לחכי אמרתך מדבשׁ לפי׃ ¹⁰⁴ מפקודיך אתבונן על כן שׂנאתי כל ארח שׁקר׃ ¹⁰⁵ נר לרגלי דברך ואור לנתיבתי׃ ¹⁰⁶ נשׁבעתי ואקימה לשׁמר משׁפטי צדקך׃ ¹⁰⁷ נעניתי עד מאד יהוה חיני כדברך׃ ¹⁰⁸ נדבות פי רצה נא יהוה ומשׁפטיך למדני׃ ¹⁰⁹ נפשׁי בכפי תמיד ותורתך לא שׁכחתי׃ ¹¹⁰ נתנו רשׁעים פח לי ומפקודיך לא תעיתי׃ ¹¹¹ נחלתי עדותיך לעולם כי שׂשׂון לבי המה׃ ¹¹² נטיתי לבי לעשׂות חקיך לעולם עקב׃ ¹¹³ סעפים שׂנאתי ותורתך אהבתי׃ ¹¹⁴ סתרי ומגני אתה לדברך יחלתי׃ ¹¹⁵ סורו ממני מרעים ואצרה מצות אלהי׃ ¹¹⁶ סמכני כאמרתך ואחיה ואל תבישׁני משׂברי׃ ¹¹⁷ סעדני ואושׁעה ואשׁעה בחקיך תמיד׃ ¹¹⁸ סלית כל שׁוגים מחקיך כי שׁקר תרמיתם׃ ¹¹⁹ סגים השׁבת כל רשׁעי ארץ לכן אהבתי עדתיך׃ ¹²⁰ סמר מפחדך בשׂרי וממשׁפטיך יראתי׃ ¹²¹ עשׂיתי משׁפט וצדק בל תניחני לעשׁקי׃ ¹²² ערב עבדך לטוב אל יעשׁקני זדים׃ ¹²³ עיני כלו לישׁועתך ולאמרת צדקך׃ ¹²⁴ עשׂה עם עבדך כחסדך וחקיך למדני׃ ¹²⁵ עבדך אני הבינני ואדעה עדתיך׃ ¹²⁶ עת לעשׂות ליהוה הפרו תורתך׃ ¹²⁷ על כן אהבתי מצותיך מזהב ומפז׃ ¹²⁸ על כן כל פקודי כל ישׁרתי כל ארח שׁקר שׂנאתי׃ ¹²⁹ פלאות עדותיך על כן נצרתם נפשׁי׃ ¹³⁰ פתח דבריך יאיר מבין פתיים׃ ¹³¹ פי פערתי ואשׁאפה כי למצותיך יאבתי׃ ¹³² פנה אלי וחנני כמשׁפט לאהבי שׁמך׃ ¹³³ פעמי הכן באמרתך ואל תשׁלט בי כל און׃ ¹³⁴ פדני מעשׁק אדם ואשׁמרה פקודיך׃ ¹³⁵ פניך האר בעבדך ולמדני את חקיך׃ ¹³⁶ פלגי מים ירדו עיני על לא שׁמרו תורתך׃ ¹³⁷ צדיק אתה יהוה וישׁר משׁפטיך׃ ¹³⁸ צוית צדק עדתיך ואמונה מאד׃ ¹³⁹ צמתתני קנאתי כי שׁכחו דבריך צרי׃ ¹⁴⁰ צרופה אמרתך מאד ועבדך אהבה׃ ¹⁴¹ צעיר אנכי ונבזה פקדיך לא שׁכחתי׃ ¹⁴² צדקתך צדק לעולם ותורתך אמת׃ ¹⁴³ צר ומצוק מצאוני מצותיך שׁעשׁעי׃ ¹⁴⁴ צדק עדותיך לעולם הבינני ואחיה׃ ¹⁴⁵ קראתי בכל לב ענני יהוה חקיך אצרה׃ ¹⁴⁶ קראתיך הושׁיעני ואשׁמרה עדתיך׃ ¹⁴⁷ קדמתי בנשׁף ואשׁועה לדבריך יחלתי׃ ¹⁴⁸ קדמו עיני אשׁמרות לשׂיח באמרתך׃ ¹⁴⁹ קולי שׁמעה כחסדך יהוה כמשׁפטך חיני׃ ¹⁵⁰ קרבו רדפי זמה מתורתך רחקו׃ ¹⁵¹ קרוב אתה יהוה וכל מצותיך אמת׃ ¹⁵² קדם ידעתי מעדתיך כי לעולם יסדתם׃ ¹⁵³ ראה עניי וחלצני כי תורתך לא שׁכחתי׃ ¹⁵⁴ ריבה ריבי וגאלני לאמרתך חיני׃ ¹⁵⁵ רחוק מרשׁעים ישׁועה כי חקיך לא דרשׁו׃ ¹⁵⁶ רחמיך רבים יהוה כמשׁפטיך חיני׃ ¹⁵⁷ רבים רדפי וצרי מעדותיך לא נטיתי׃ ¹⁵⁸ ראיתי בגדים ואתקוטטה אשׁר אמרתך לא שׁמרו׃ ¹⁵⁹ ראה כי פקודיך אהבתי יהוה כחסדך חיני׃ ¹⁶⁰ ראשׁ דברך אמת ולעולם כל משׁפט צדקך׃ ¹⁶¹ שׂרים רדפוני חנם ומדבריך פחד לבי׃ ¹⁶² שׂשׂ אנכי על אמרתך כמוצא שׁלל רב׃ ¹⁶³ שׁקר שׂנאתי ואתעבה תורתך אהבתי׃ ¹⁶⁴ שׁבע ביום הללתיך על משׁפטי צדקך׃ ¹⁶⁵ שׁלום רב לאהבי תורתך ואין למו מכשׁול׃ ¹⁶⁶ שׂברתי לישׁועתך יהוה ומצותיך עשׂיתי׃ ¹⁶⁷ שׁמרה נפשׁי עדתיך ואהבם מאד׃ ¹⁶⁸ שׁמרתי פקודיך ועדתיך כי כל דרכי נגדך׃ ¹⁶⁹ תקרב רנתי לפניך יהוה כדברך הבינני׃ ¹⁷⁰ תבוא תחנתי לפניך כאמרתך הצילני׃ ¹⁷¹ תבענה שׂפתי תהלה כי תלמדני חקיך׃ ¹⁷² תען לשׁוני אמרתך כי כל מצותיך צדק׃ ¹⁷³ תהי ידך לעזרני כי פקודיך בחרתי׃ ¹⁷⁴ תאבתי לישׁועתך יהוה ותורתך שׁעשׁעי׃ ¹⁷⁵ תחי נפשׁי ותהללך ומשׁפטך יעזרני׃ ¹⁷⁶ תעיתי כשׂה אבד בקשׁ עבדך כי מצותיך לא שׁכחתי׃