Numbers 31 וידבר יהוה אל משׁה לאמר׃

HOT⁽ⁱ⁾ ¹ וידבר יהוה אל משׁה לאמר׃ ² נקם נקמת בני ישׂראל מאת המדינים אחר תאסף אל עמיך׃ ³ וידבר משׁה אל העם לאמר החלצו מאתכם אנשׁים לצבא ויהיו על מדין לתת נקמת יהוה במדין׃ ⁴ אלף למטה אלף למטה לכל מטות ישׂראל תשׁלחו לצבא׃ ⁵ וימסרו מאלפי ישׂראל אלף למטה שׁנים עשׂר אלף חלוצי צבא׃ ⁶ וישׁלח אתם משׁה אלף למטה לצבא אתם ואת פינחס בן אלעזר הכהן לצבא וכלי הקדשׁ וחצצרות התרועה בידו׃ ⁷ ויצבאו על מדין כאשׁר צוה יהוה את משׁה ויהרגו כל זכר׃ ⁸ ואת מלכי מדין הרגו על חלליהם את אוי ואת רקם ואת צור ואת חור ואת רבע חמשׁת מלכי מדין ואת בלעם בן בעור הרגו בחרב׃ ⁹ וישׁבו בני ישׂראל את נשׁי מדין ואת טפם ואת כל בהמתם ואת כל מקנהם ואת כל חילם בזזו׃ ¹⁰ ואת כל עריהם במושׁבתם ואת כל טירתם שׂרפו באשׁ׃ ¹¹ ויקחו את כל השׁלל ואת כל המלקוח באדם ובבהמה׃ ¹² ויבאו אל משׁה ואל אלעזר הכהן ואל עדת בני ישׂראל את השׁבי ואת המלקוח ואת השׁלל אל המחנה אל ערבת מואב אשׁר על ירדן ירחו׃ ¹³ ויצאו משׁה ואלעזר הכהן וכל נשׂיאי העדה לקראתם אל מחוץ למחנה׃ ¹⁴ ויקצף משׁה על פקודי החיל שׂרי האלפים ושׂרי המאות הבאים מצבא המלחמה׃ ¹⁵ ויאמר אליהם משׁה החייתם כל נקבה׃ ¹⁶ הן הנה היו לבני ישׂראל בדבר בלעם למסר מעל ביהוה על דבר פעור ותהי המגפה בעדת יהוה׃ ¹⁷ ועתה הרגו כל זכר בטף וכל אשׁה ידעת אישׁ למשׁכב זכר הרגו׃ ¹⁸ וכל הטף בנשׁים אשׁר לא ידעו משׁכב זכר החיו׃ ¹⁹ ואתם חנו מחוץ למחנה שׁבעת ימים כל הרג נפשׁ וכל נגע בחלל תתחטאו ביום השׁלישׁי וביום השׁביעי אתם ושׁביכם׃ ²⁰ וכל בגד וכל כלי עור וכל מעשׂה עזים וכל כלי עץ תתחטאו׃ ²¹ ויאמר אלעזר הכהן אל אנשׁי הצבא הבאים למלחמה זאת חקת התורה אשׁר צוה יהוה את משׁה׃ ²² אך את הזהב ואת הכסף את הנחשׁת את הברזל את הבדיל ואת העפרת׃ ²³ כל דבר אשׁר יבא באשׁ תעבירו באשׁ וטהר אך במי נדה יתחטא וכל אשׁר לא יבא באשׁ תעבירו במים׃ ²⁴ וכבסתם בגדיכם ביום השׁביעי וטהרתם ואחר תבאו אל המחנה׃ ²⁵ ויאמר יהוה אל משׁה לאמר׃ ²⁶ שׂא את ראשׁ מלקוח השׁבי באדם ובבהמה אתה ואלעזר הכהן וראשׁי אבות העדה׃ ²⁷ וחצית את המלקוח בין תפשׂי המלחמה היצאים לצבא ובין כל העדה׃ ²⁸ והרמת מכס ליהוה מאת אנשׁי המלחמה היצאים לצבא אחד נפשׁ מחמשׁ המאות מן האדם ומן הבקר ומן החמרים ומן הצאן׃ ²⁹ ממחציתם תקחו ונתתה לאלעזר הכהן תרומת יהוה׃ ³⁰ וממחצת בני ישׂראל תקח אחד אחז מן החמשׁים מן האדם מן הבקר מן החמרים ומן הצאן מכל הבהמה ונתתה אתם ללוים שׁמרי משׁמרת משׁכן יהוה׃ ³¹ ויעשׂ משׁה ואלעזר הכהן כאשׁר צוה יהוה את משׁה׃ ³² ויהי המלקוח יתר הבז אשׁר בזזו עם הצבא צאן שׁשׁ מאות אלף ושׁבעים אלף וחמשׁת אלפים׃ ³³ ובקר שׁנים ושׁבעים אלף׃ ³⁴ וחמרים אחד ושׁשׁים אלף׃ ³⁵ ונפשׁ אדם מן הנשׁים אשׁר לא ידעו משׁכב זכר כל נפשׁ שׁנים ושׁלשׁים אלף׃ ³⁶ ותהי המחצה חלק היצאים בצבא מספר הצאן שׁלשׁ מאות אלף ושׁלשׁים אלף ושׁבעת אלפים וחמשׁ מאות׃ ³⁷ ויהי המכס ליהוה מן הצאן שׁשׁ מאות חמשׁ ושׁבעים׃ ³⁸ והבקר שׁשׁה ושׁלשׁים אלף ומכסם ליהוה שׁנים ושׁבעים׃ ³⁹ וחמרים שׁלשׁים אלף וחמשׁ מאות ומכסם ליהוה אחד ושׁשׁים׃ ⁴⁰ ונפשׁ אדם שׁשׁה עשׂר אלף ומכסם ליהוה שׁנים ושׁלשׁים נפשׁ׃ ⁴¹ ויתן משׁה את מכס תרומת יהוה לאלעזר הכהן כאשׁר צוה יהוה את משׁה׃ ⁴² וממחצית בני ישׂראל אשׁר חצה משׁה מן האנשׁים הצבאים׃ ⁴³ ותהי מחצת העדה מן הצאן שׁלשׁ מאות אלף ושׁלשׁים אלף שׁבעת אלפים וחמשׁ מאות׃ ⁴⁴ ובקר שׁשׁה ושׁלשׁים אלף׃ ⁴⁵ וחמרים שׁלשׁים אלף וחמשׁ מאות׃ ⁴⁶ ונפשׁ אדם שׁשׁה עשׂר אלף׃ ⁴⁷ ויקח משׁה ממחצת בני ישׂראל את האחז אחד מן החמשׁים מן האדם ומן הבהמה ויתן אתם ללוים שׁמרי משׁמרת משׁכן יהוה כאשׁר צוה יהוה את משׁה׃ ⁴⁸ ויקרבו אל משׁה הפקדים אשׁר לאלפי הצבא שׂרי האלפים ושׂרי המאות׃ ⁴⁹ ויאמרו אל משׁה עבדיך נשׂאו את ראשׁ אנשׁי המלחמה אשׁר בידנו ולא נפקד ממנו אישׁ׃ ⁵⁰ ונקרב את קרבן יהוה אישׁ אשׁר מצא כלי זהב אצעדה וצמיד טבעת עגיל וכומז לכפר על נפשׁתינו לפני יהוה׃ ⁵¹ ויקח משׁה ואלעזר הכהן את הזהב מאתם כל כלי מעשׂה׃ ⁵² ויהי כל זהב התרומה אשׁר הרימו ליהוה שׁשׁה עשׂר אלף שׁבע מאות וחמשׁים שׁקל מאת שׂרי האלפים ומאת שׂרי המאות׃ ⁵³ אנשׁי הצבא בזזו אישׁ׃ ⁵⁴ ויקח משׁה ואלעזר הכהן את הזהב מאת שׂרי האלפים והמאות ויבאו אתו אל אהל מועד זכרון לבני ישׂראל לפני יהוה׃