Numbers 15 וידבר יהוה אל משׁה לאמר׃

HOT⁽ⁱ⁾ ¹ וידבר יהוה אל משׁה לאמר׃ ² דבר אל בני ישׂראל ואמרת אלהם כי תבאו אל ארץ מושׁבתיכם אשׁר אני נתן׃ ³ ועשׂיתם אשׁה ליהוה עלה או זבח לפלא נדר או בנדבה או במעדיכם לעשׂות ריח ניחח ליהוה מן הבקר או מן הצאן׃ ⁴ והקריב המקריב קרבנו ליהוה מנחה סלת עשׂרון בלול ברבעית ההין שׁמן׃ ⁵ ויין לנסך רביעית ההין תעשׂה על העלה או לזבח לכבשׂ האחד׃ ⁶ או לאיל תעשׂה מנחה סלת שׁני עשׂרנים בלולה בשׁמן שׁלשׁית ההין׃ ⁷ ויין לנסך שׁלשׁית ההין תקריב ריח ניחח ליהוה׃ ⁸ וכי תעשׂה בן בקר עלה או זבח לפלא נדר או שׁלמים ליהוה׃ ⁹ והקריב על בן הבקר מנחה סלת שׁלשׁה עשׂרנים בלול בשׁמן חצי ההין׃ ¹⁰ ויין תקריב לנסך חצי ההין אשׁה ריח ניחח ליהוה׃ ¹¹ ככה יעשׂה לשׁור האחד או לאיל האחד או לשׂה בכבשׂים או בעזים׃ ¹² כמספר אשׁר תעשׂו ככה תעשׂו לאחד כמספרם׃ ¹³ כל האזרח יעשׂה ככה את אלה להקריב אשׁה ריח ניחח ליהוה׃ ¹⁴ וכי יגור אתכם גר או אשׁר בתוככם לדרתיכם ועשׂה אשׁה ריח ניחח ליהוה כאשׁר תעשׂו כן יעשׂה׃ ¹⁵ הקהל חקה אחת לכם ולגר הגר חקת עולם לדרתיכם ככם כגר יהיה לפני יהוה׃ ¹⁶ תורה אחת ומשׁפט אחד יהיה לכם ולגר הגר אתכם׃ ¹⁷ וידבר יהוה אל משׁה לאמר׃ ¹⁸ דבר אל בני ישׂראל ואמרת אלהם בבאכם אל הארץ אשׁר אני מביא אתכם שׁמה׃ ¹⁹ והיה באכלכם מלחם הארץ תרימו תרומה ליהוה׃ ²⁰ ראשׁית ערסתכם חלה תרימו תרומה כתרומת גרן כן תרימו אתה׃ ²¹ מראשׁית ערסתיכם תתנו ליהוה תרומה לדרתיכם׃ ²² וכי תשׁגו ולא תעשׂו את כל המצות האלה אשׁר דבר יהוה אל משׁה׃ ²³ את כל אשׁר צוה יהוה אליכם ביד משׁה מן היום אשׁר צוה יהוה והלאה לדרתיכם׃ ²⁴ והיה אם מעיני העדה נעשׂתה לשׁגגה ועשׂו כל העדה פר בן בקר אחד לעלה לריח ניחח ליהוה ומנחתו ונסכו כמשׁפט ושׂעיר עזים אחד לחטת׃ ²⁵ וכפר הכהן על כל עדת בני ישׂראל ונסלח להם כי שׁגגה הוא והם הביאו את קרבנם אשׁה ליהוה וחטאתם לפני יהוה על שׁגגתם׃ ²⁶ ונסלח לכל עדת בני ישׂראל ולגר הגר בתוכם כי לכל העם בשׁגגה׃ ²⁷ ואם נפשׁ אחת תחטא בשׁגגה והקריבה עז בת שׁנתה לחטאת׃ ²⁸ וכפר הכהן על הנפשׁ השׁגגת בחטאה בשׁגגה לפני יהוה לכפר עליו ונסלח׃ ²⁹ האזרח בבני ישׂראל ולגר הגר בתוכם תורה אחת יהיה לכם לעשׂה בשׁגגה׃ ³⁰ והנפשׁ אשׁר תעשׂה ביד רמה מן האזרח ומן הגר את יהוה הוא מגדף ונכרתה הנפשׁ ההוא מקרב עמה׃ ³¹ כי דבר יהוה בזה ואת מצותו הפר הכרת תכרת הנפשׁ ההוא עונה׃ ³² ויהיו בני ישׂראל במדבר וימצאו אישׁ מקשׁשׁ עצים ביום השׁבת׃ ³³ ויקריבו אתו המצאים אתו מקשׁשׁ עצים אל משׁה ואל אהרן ואל כל העדה׃ ³⁴ ויניחו אתו במשׁמר כי לא פרשׁ מה יעשׂה׃ ³⁵ ויאמר יהוה אל משׁה מות יומת האישׁ רגום אתו באבנים כל העדה מחוץ למחנה׃ ³⁶ ויציאו אתו כל העדה אל מחוץ למחנה וירגמו אתו באבנים וימת כאשׁר צוה יהוה את משׁה׃ ³⁷ ויאמר יהוה אל משׁה לאמר׃ ³⁸ דבר אל בני ישׂראל ואמרת אלהם ועשׂו להם ציצת על כנפי בגדיהם לדרתם ונתנו על ציצת הכנף פתיל תכלת׃ ³⁹ והיה לכם לציצת וראיתם אתו וזכרתם את כל מצות יהוה ועשׂיתם אתם ולא תתורו אחרי לבבכם ואחרי עיניכם אשׁר אתם זנים אחריהם׃ ⁴⁰ למען תזכרו ועשׂיתם את כל מצותי והייתם קדשׁים לאלהיכם׃ ⁴¹ אני יהוה אלהיכם אשׁר הוצאתי אתכם מארץ מצרים להיות לכם לאלהים אני יהוה אלהיכם׃