Numbers 14 ותשׂא כל העדה ויתנו את קולם ויבכו העם בלילה ההוא׃

HOT⁽ⁱ⁾ ¹ ותשׂא כל העדה ויתנו את קולם ויבכו העם בלילה ההוא׃ ² וילנו על משׁה ועל אהרן כל בני ישׂראל ויאמרו אלהם כל העדה לו מתנו בארץ מצרים או במדבר הזה לו מתנו׃ ³ ולמה יהוה מביא אתנו אל הארץ הזאת לנפל בחרב נשׁינו וטפנו יהיו לבז הלוא טוב לנו שׁוב מצרימה׃ ⁴ ויאמרו אישׁ אל אחיו נתנה ראשׁ ונשׁובה מצרימה׃ ⁵ ויפל משׁה ואהרן על פניהם לפני כל קהל עדת בני ישׂראל׃ ⁶ ויהושׁע בן נון וכלב בן יפנה מן התרים את הארץ קרעו בגדיהם׃ ⁷ ויאמרו אל כל עדת בני ישׂראל לאמר הארץ אשׁר עברנו בה לתור אתה טובה הארץ מאד מאד׃ ⁸ אם חפץ בנו יהוה והביא אתנו אל הארץ הזאת ונתנה לנו ארץ אשׁר הוא זבת חלב ודבשׁ׃ ⁹ אך ביהוה אל תמרדו ואתם אל תיראו את עם הארץ כי לחמנו הם סר צלם מעליהם ויהוה אתנו אל תיראם׃ ¹⁰ ויאמרו כל העדה לרגום אתם באבנים וכבוד יהוה נראה באהל מועד אל כל בני ישׂראל׃ ¹¹ ויאמר יהוה אל משׁה עד אנה ינאצני העם הזה ועד אנה לא יאמינו בי בכל האתות אשׁר עשׂיתי בקרבו׃ ¹² אכנו בדבר ואורשׁנו ואעשׂה אתך לגוי גדול ועצום ממנו׃ ¹³ ויאמר משׁה אל יהוה ושׁמעו מצרים כי העלית בכחך את העם הזה מקרבו׃ ¹⁴ ואמרו אל יושׁב הארץ הזאת שׁמעו כי אתה יהוה בקרב העם הזה אשׁר עין בעין נראה אתה יהוה ועננך עמד עלהם ובעמד ענן אתה הלך לפניהם יומם ובעמוד אשׁ לילה׃ ¹⁵ והמתה את העם הזה כאישׁ אחד ואמרו הגוים אשׁר שׁמעו את שׁמעך לאמר׃ ¹⁶ מבלתי יכלת יהוה להביא את העם הזה אל הארץ אשׁר נשׁבע להם וישׁחטם במדבר׃ ¹⁷ ועתה יגדל נא כח אדני כאשׁר דברת לאמר׃ ¹⁸ יהוה ארך אפים ורב חסד נשׂא עון ופשׁע ונקה לא ינקה פקד עון אבות על בנים על שׁלשׁים ועל רבעים׃ ¹⁹ סלח נא לעון העם הזה כגדל חסדך וכאשׁר נשׂאתה לעם הזה ממצרים ועד הנה׃ ²⁰ ויאמר יהוה סלחתי כדברך׃ ²¹ ואולם חי אני וימלא כבוד יהוה את כל הארץ׃ ²² כי כל האנשׁים הראים את כבדי ואת אתתי אשׁר עשׂיתי במצרים ובמדבר וינסו אתי זה עשׂר פעמים ולא שׁמעו בקולי׃ ²³ אם יראו את הארץ אשׁר נשׁבעתי לאבתם וכל מנאצי לא יראוה׃ ²⁴ ועבדי כלב עקב היתה רוח אחרת עמו וימלא אחרי והביאתיו אל הארץ אשׁר בא שׁמה וזרעו יורשׁנה׃ ²⁵ והעמלקי והכנעני יושׁב בעמק מחר פנו וסעו לכם המדבר דרך ים סוף׃ ²⁶ וידבר יהוה אל משׁה ואל אהרן לאמר׃ ²⁷ עד מתי לעדה הרעה הזאת אשׁר המה מלינים עלי את תלנות בני ישׂראל אשׁר המה מלינים עלי שׁמעתי׃ ²⁸ אמר אלהם חי אני נאם יהוה אם לא כאשׁר דברתם באזני כן אעשׂה׃ ²⁹ במדבר הזה יפלו פגריכם וכל פקדיכם לכל מספרכם מבן עשׂרים שׁנה ומעלה אשׁר הלינתם עלי׃ ³⁰ אם אתם תבאו אל הארץ אשׁר נשׂאתי את ידי לשׁכן אתכם בה כי אם כלב בן יפנה ויהושׁע בן נון׃ ³¹ וטפכם אשׁר אמרתם לבז יהיה והביאתי אתם וידעו את הארץ אשׁר מאסתם׃ ³² ופגריכם אתם יפלו במדבר הזה׃ ³³ ובניכם יהיו רעים במדבר ארבעים שׁנה ונשׂאו את זנותיכם עד תם פגריכם במדבר׃ ³⁴ במספר הימים אשׁר תרתם את הארץ ארבעים יום יום לשׁנה יום לשׁנה תשׂאו את עונתיכם ארבעים שׁנה וידעתם את תנואתי׃ ³⁵ אני יהוה דברתי אם לא זאת אעשׂה לכל העדה הרעה הזאת הנועדים עלי במדבר הזה יתמו ושׁם ימתו׃ ³⁶ והאנשׁים אשׁר שׁלח משׁה לתור את הארץ וישׁבו וילונו עליו את כל העדה להוציא דבה על הארץ׃ ³⁷ וימתו האנשׁים מוצאי דבת הארץ רעה במגפה לפני יהוה׃ ³⁸ ויהושׁע בן נון וכלב בן יפנה חיו מן האנשׁים ההם ההלכים לתור את הארץ׃ ³⁹ וידבר משׁה את הדברים האלה אל כל בני ישׂראל ויתאבלו העם מאד׃ ⁴⁰ וישׁכמו בבקר ויעלו אל ראשׁ ההר לאמר הננו ועלינו אל המקום אשׁר אמר יהוה כי חטאנו׃ ⁴¹ ויאמר משׁה למה זה אתם עברים את פי יהוה והוא לא תצלח׃ ⁴² אל תעלו כי אין יהוה בקרבכם ולא תנגפו לפני איביכם׃ ⁴³ כי העמלקי והכנעני שׁם לפניכם ונפלתם בחרב כי על כן שׁבתם מאחרי יהוה ולא יהיה יהוה עמכם׃ ⁴⁴ ויעפלו לעלות אל ראשׁ ההר וארון ברית יהוה ומשׁה לא משׁו מקרב המחנה׃ ⁴⁵ וירד העמלקי והכנעני הישׁב בהר ההוא ויכום ויכתום עד החרמה׃