Leviticus 25 וידבר יהוה אל משׁה בהר סיני לאמר׃

HOT⁽ⁱ⁾ ¹ וידבר יהוה אל משׁה בהר סיני לאמר׃ ² דבר אל בני ישׂראל ואמרת אלהם כי תבאו אל הארץ אשׁר אני נתן לכם ושׁבתה הארץ שׁבת ליהוה׃ ³ שׁשׁ שׁנים תזרע שׂדך ושׁשׁ שׁנים תזמר כרמך ואספת את תבואתה׃ ⁴ ובשׁנה השׁביעת שׁבת שׁבתון יהיה לארץ שׁבת ליהוה שׂדך לא תזרע וכרמך לא תזמר׃ ⁵ את ספיח קצירך לא תקצור ואת ענבי נזירך לא תבצר שׁנת שׁבתון יהיה לארץ׃ ⁶ והיתה שׁבת הארץ לכם לאכלה לך ולעבדך ולאמתך ולשׂכירך ולתושׁבך הגרים עמך׃ ⁷ ולבהמתך ולחיה אשׁר בארצך תהיה כל תבואתה לאכל׃ ⁸ וספרת לך שׁבע שׁבתת שׁנים שׁבע שׁנים שׁבע פעמים והיו לך ימי שׁבע שׁבתת השׁנים תשׁע וארבעים שׁנה׃ ⁹ והעברת שׁופר תרועה בחדשׁ השׁבעי בעשׂור לחדשׁ ביום הכפרים תעבירו שׁופר בכל ארצכם׃ ¹⁰ וקדשׁתם את שׁנת החמשׁים שׁנה וקראתם דרור בארץ לכל ישׁביה יובל הוא תהיה לכם ושׁבתם אישׁ אל אחזתו ואישׁ אל משׁפחתו תשׁבו׃ ¹¹ יובל הוא שׁנת החמשׁים שׁנה תהיה לכם לא תזרעו ולא תקצרו את ספיחיה ולא תבצרו את נזריה׃ ¹² כי יובל הוא קדשׁ תהיה לכם מן השׂדה תאכלו את תבואתה׃ ¹³ בשׁנת היובל הזאת תשׁבו אישׁ אל אחזתו׃ ¹⁴ וכי תמכרו ממכר לעמיתך או קנה מיד עמיתך אל תונו אישׁ את אחיו׃ ¹⁵ במספר שׁנים אחר היובל תקנה מאת עמיתך במספר שׁני תבואת ימכר׃ ¹⁶ לפי רב השׁנים תרבה מקנתו ולפי מעט השׁנים תמעיט מקנתו כי מספר תבואת הוא מכר׃ ¹⁷ ולא תונו אישׁ את עמיתו ויראת מאלהיך כי אני יהוה אלהיכם׃ ¹⁸ ועשׂיתם את חקתי ואת משׁפטי תשׁמרו ועשׂיתם אתם וישׁבתם על הארץ לבטח׃ ¹⁹ ונתנה הארץ פריה ואכלתם לשׂבע וישׁבתם לבטח עליה׃ ²⁰ וכי תאמרו מה נאכל בשׁנה השׁביעת הן לא נזרע ולא נאסף את תבואתנו׃ ²¹ וצויתי את ברכתי לכם בשׁנה השׁשׁית ועשׂת את התבואה לשׁלשׁ השׁנים׃ ²² וזרעתם את השׁנה השׁמינת ואכלתם מן התבואה ישׁן עד השׁנה התשׁיעת עד בוא תבואתה תאכלו ישׁן׃ ²³ והארץ לא תמכר לצמתת כי לי הארץ כי גרים ותושׁבים אתם עמדי׃ ²⁴ ובכל ארץ אחזתכם גאלה תתנו לארץ׃ ²⁵ כי ימוך אחיך ומכר מאחזתו ובא גאלו הקרב אליו וגאל את ממכר אחיו׃ ²⁶ ואישׁ כי לא יהיה לו גאל והשׂיגה ידו ומצא כדי גאלתו׃ ²⁷ וחשׁב את שׁני ממכרו והשׁיב את העדף לאישׁ אשׁר מכר לו ושׁב לאחזתו׃ ²⁸ ואם לא מצאה ידו די השׁיב לו והיה ממכרו ביד הקנה אתו עד שׁנת היובל ויצא ביבל ושׁב לאחזתו׃ ²⁹ ואישׁ כי ימכר בית מושׁב עיר חומה והיתה גאלתו עד תם שׁנת ממכרו ימים תהיה גאלתו׃ ³⁰ ואם לא יגאל עד מלאת לו שׁנה תמימה וקם הבית אשׁר בעיר אשׁר לא חמה לצמיתת לקנה אתו לדרתיו לא יצא ביבל׃ ³¹ ובתי החצרים אשׁר אין להם חמה סביב על שׂדה הארץ יחשׁב גאלה תהיה לו וביבל יצא׃ ³² וערי הלוים בתי ערי אחזתם גאלת עולם תהיה ללוים׃ ³³ ואשׁר יגאל מן הלוים ויצא ממכר בית ועיר אחזתו ביבל כי בתי ערי הלוים הוא אחזתם בתוך בני ישׂראל׃ ³⁴ ושׂדה מגרשׁ עריהם לא ימכר כי אחזת עולם הוא׃ ³⁵ וכי ימוך אחיך ומטה ידו עמך והחזקת בו גר ותושׁב וחי עמך׃ ³⁶ אל תקח מאתו נשׁך ותרבית ויראת מאלהיך וחי אחיך עמך׃ ³⁷ את כספך לא תתן לו בנשׁך ובמרבית לא תתן אכלך׃ ³⁸ אני יהוה אלהיכם אשׁר הוצאתי אתכם מארץ מצרים לתת לכם את ארץ כנען להיות לכם לאלהים׃ ³⁹ וכי ימוך אחיך עמך ונמכר לך לא תעבד בו עבדת עבד׃ ⁴⁰ כשׂכיר כתושׁב יהיה עמך עד שׁנת היבל יעבד עמך׃ ⁴¹ ויצא מעמך הוא ובניו עמו ושׁב אל משׁפחתו ואל אחזת אבתיו ישׁוב׃ ⁴² כי עבדי הם אשׁר הוצאתי אתם מארץ מצרים לא ימכרו ממכרת עבד׃ ⁴³ לא תרדה בו בפרך ויראת מאלהיך׃ ⁴⁴ ועבדך ואמתך אשׁר יהיו לך מאת הגוים אשׁר סביבתיכם מהם תקנו עבד ואמה׃ ⁴⁵ וגם מבני התושׁבים הגרים עמכם מהם תקנו וממשׁפחתם אשׁר עמכם אשׁר הולידו בארצכם והיו לכם לאחזה׃ ⁴⁶ והתנחלתם אתם לבניכם אחריכם לרשׁת אחזה לעלם בהם תעבדו ובאחיכם בני ישׂראל אישׁ באחיו לא תרדה בו בפרך׃ ⁴⁷ וכי תשׂיג יד גר ותושׁב עמך ומך אחיך עמו ונמכר לגר תושׁב עמך או לעקר משׁפחת גר׃ ⁴⁸ אחרי נמכר גאלה תהיה לו אחד מאחיו יגאלנו׃ ⁴⁹ או דדו או בן דדו יגאלנו או משׁאר בשׂרו ממשׁפחתו יגאלנו או השׂיגה ידו ונגאל׃ ⁵⁰ וחשׁב עם קנהו משׁנת המכרו לו עד שׁנת היבל והיה כסף ממכרו במספר שׁנים כימי שׂכיר יהיה עמו׃ ⁵¹ אם עוד רבות בשׁנים לפיהן ישׁיב גאלתו מכסף מקנתו׃ ⁵² ואם מעט נשׁאר בשׁנים עד שׁנת היבל וחשׁב לו כפי שׁניו ישׁיב את גאלתו׃ ⁵³ כשׂכיר שׁנה בשׁנה יהיה עמו לא ירדנו בפרך לעיניך׃ ⁵⁴ ואם לא יגאל באלה ויצא בשׁנת היבל הוא ובניו עמו׃ ⁵⁵ כי לי בני ישׂראל עבדים עבדי הם אשׁר הוצאתי אותם מארץ מצרים אני יהוה אלהיכם׃