Leviticus 22 וידבר יהוה אל משׁה לאמר׃

HOT⁽ⁱ⁾ ¹ וידבר יהוה אל משׁה לאמר׃ ² דבר אל אהרן ואל בניו וינזרו מקדשׁי בני ישׂראל ולא יחללו את שׁם קדשׁי אשׁר הם מקדשׁים לי אני יהוה׃ ³ אמר אלהם לדרתיכם כל אישׁ אשׁר יקרב מכל זרעכם אל הקדשׁים אשׁר יקדישׁו בני ישׂראל ליהוה וטמאתו עליו ונכרתה הנפשׁ ההוא מלפני אני יהוה׃ ⁴ אישׁ אישׁ מזרע אהרן והוא צרוע או זב בקדשׁים לא יאכל עד אשׁר יטהר והנגע בכל טמא נפשׁ או אישׁ אשׁר תצא ממנו שׁכבת זרע׃ ⁵ או אישׁ אשׁר יגע בכל שׁרץ אשׁר יטמא לו או באדם אשׁר יטמא לו לכל טמאתו׃ ⁶ נפשׁ אשׁר תגע בו וטמאה עד הערב ולא יאכל מן הקדשׁים כי אם רחץ בשׂרו במים׃ ⁷ ובא השׁמשׁ וטהר ואחר יאכל מן הקדשׁים כי לחמו הוא׃ ⁸ נבלה וטרפה לא יאכל לטמאה בה אני יהוה׃ ⁹ ושׁמרו את משׁמרתי ולא ישׂאו עליו חטא ומתו בו כי יחללהו אני יהוה מקדשׁם׃ ¹⁰ וכל זר לא יאכל קדשׁ תושׁב כהן ושׂכיר לא יאכל קדשׁ׃ ¹¹ וכהן כי יקנה נפשׁ קנין כספו הוא יאכל בו ויליד ביתו הם יאכלו בלחמו׃ ¹² ובת כהן כי תהיה לאישׁ זר הוא בתרומת הקדשׁים לא תאכל׃ ¹³ ובת כהן כי תהיה אלמנה וגרושׁה וזרע אין לה ושׁבה אל בית אביה כנעוריה מלחם אביה תאכל וכל זר לא יאכל׃ ¹⁴ ואישׁ כי יאכל קדשׁ בשׁגגה ויסף חמשׁיתו עליו ונתן לכהן את הקדשׁ׃ ¹⁵ ולא יחללו את קדשׁי בני ישׂראל את אשׁר ירימו ליהוה׃ ¹⁶ והשׂיאו אותם עון אשׁמה באכלם את קדשׁיהם כי אני יהוה מקדשׁם׃ ¹⁷ וידבר יהוה אל משׁה לאמר׃ ¹⁸ דבר אל אהרן ואל בניו ואל כל בני ישׂראל ואמרת אלהם אישׁ אישׁ מבית ישׂראל ומן הגר בישׂראל אשׁר יקריב קרבנו לכל נדריהם ולכל נדבותם אשׁר יקריבו ליהוה לעלה׃ ¹⁹ לרצנכם תמים זכר בבקר בכשׂבים ובעזים׃ ²⁰ כל אשׁר בו מום לא תקריבו כי לא לרצון יהיה׃ ²¹ ואישׁ כי יקריב זבח שׁלמים ליהוה לפלא נדר או לנדבה בבקר או בצאן תמים יהיה לרצון כל מום לא יהיה׃ ²² עורת או שׁבור או חרוץ או יבלת או גרב או ילפת לא תקריבו אלה ליהוה ואשׁה לא תתנו מהם על המזבח ליהוה׃ ²³ ושׁור ושׂה שׂרוע וקלוט נדבה תעשׂה אתו ולנדר לא ירצה׃ ²⁴ ומעוך וכתות ונתוק וכרות לא תקריבו ליהוה ובארצכם לא תעשׂו׃ ²⁵ ומיד בן נכר לא תקריבו את לחם אלהיכם מכל אלה כי משׁחתם בהם מום בם לא ירצו׃ ²⁶ וידבר יהוה אל משׁה לאמר׃ ²⁷ שׁור או כשׂב או עז כי יולד והיה שׁבעת ימים תחת אמו ומיום השׁמיני והלאה ירצה לקרבן אשׁה ליהוה׃ ²⁸ ושׁור או שׂה אתו ואת בנו לא תשׁחטו ביום אחד׃ ²⁹ וכי תזבחו זבח תודה ליהוה לרצנכם תזבחו׃ ³⁰ ביום ההוא יאכל לא תותירו ממנו עד בקר אני יהוה׃ ³¹ ושׁמרתם מצותי ועשׂיתם אתם אני יהוה׃ ³² ולא תחללו את שׁם קדשׁי ונקדשׁתי בתוך בני ישׂראל אני יהוה מקדשׁכם׃ ³³ המוציא אתכם מארץ מצרים להיות לכם לאלהים אני יהוה׃