Joshua 23

HOT^{(i) 1} ויהי מימים רבים אחרי אשׁר הניח יהוה לישׂראל מכל איביהם מסביב ויהושׁע זקן בא בימים׃ ² ויקרא יהושׁע לכל ישׂראל לזקניו ולראשׁיו ולשׁפטיו ולשׁטריו ויאמר אלהם אני זקנתי באתי בימים׃ ³ ואתם ראיתם את כל אשׁר עשׂה יהוה אלהיכם לכל הגוים האלה מפניכם כי יהוה אלהיכם הוא הנלחם׃ ⁴ ראו הפלתי לכם את הגוים הנשׁארים האלה בנחלה לשׁבטיכם מן הירדן וכל הגוים אשׁר הכרתי והים הגדול מבוא השׁמשׁ׃ ⁵ ויהוה אלהיכם הוא יהדפם מפניכם והורישׁ אתם מלפניכם וירשׁתם את ארצם כאשׁר דבר יהוה אלהיכם׃ ⁶ וחזקתם מאד לשׁמר ולעשׂות את כל הכתוב בספר תורת משׁה לבלתי סור ממנו ימין ושׂמאול׃ ⁷ לבלתי בוא בגוים האלה הנשׁארים האלה אתכם ובשׁם אלהיהם לא תזכירו ולא תשׁביעו ולא תעבדום ולא תשׁתחוו׃ ⁸ כי אם ביהוה אלהיכם תדבקו כאשׁר עשׂיתם עד היום הזה׃ ⁹ ויורשׁ יהוה מפניכם גוים גדלים ועצומים ואתם לא עמד אישׁ בפניכם עד היום הזה׃ ¹⁰ אישׁ אחד מכם ירדף אלף כי יהוה אלהיכם הוא הנלחם לכם כאשׁר דבר׃ ¹¹ ונשׁמרתם מאד לנפשׁתיכם לאהבה את יהוה אלהיכם׃ ¹² כי אם שׁוב תשׁובו ודבקתם ביתר הגוים האלה הנשׁארים האלה אתכם והתחתנתם בהם ובאתם בהם והם׃ ¹³ ידוע תדעו כי לא יוסיף יהוה אלהיכם להורישׁ את הגוים האלה מלפניכם והיו לכם לפח ולמוקשׁ ולשׁטט בצדיכם ולצננים בעיניכם עד אבדכם מעל האדמה הטובה הזאת אשׁר נתן לכם יהוה אלהיכם׃ ¹⁴ והנה אנכי הולך היום בדרך כל הארץ וידעתם בכל לבבכם ובכל נפשׁכם כי לא נפל דבר אחד מכל הדברים הטובים אשׁר דבר יהוה אלהיכם עליכם הכל באו לכם לא נפל ממנו דבר אחד׃ ¹⁵ והיה כאשׁר בא עליכם כל הדבר הטוב אשׁר דבר יהוה אלהיכם אליכם כן יביא יהוה עליכם את כל הדבר הרע עד השׁמידו אותכם מעל האדמה הטובה הזאת אשׁר נתן לכם יהוה אלהיכם׃ ¹⁶ בעברכם את ברית יהוה אלהיכם אשׁר צוה אתכם והלכתם ועבדתם אלהים אחרים והשׁתחויתם להם וחרה אף יהוה בכם ואבדתם מהרה מעל הארץ הטובה אשׁר נתן׃