Joshua 18 ויקהלו כל עדת בני ישׂראל שׁלה וישׁכינו שׁם את אהל מועד והארץ נכבשׁה לפניהם׃

HOT⁽ⁱ⁾ ¹ ויקהלו כל עדת בני ישׂראל שׁלה וישׁכינו שׁם את אהל מועד והארץ נכבשׁה לפניהם׃ ² ויותרו בבני ישׂראל אשׁר לא חלקו את נחלתם שׁבעה שׁבטים׃ ³ ויאמר יהושׁע אל בני ישׂראל עד אנה אתם מתרפים לבוא לרשׁת את הארץ אשׁר נתן לכם יהוה אלהי אבותיכם׃ ⁴ הבו לכם שׁלשׁה אנשׁים לשׁבט ואשׁלחם ויקמו ויתהלכו בארץ ויכתבו אותה לפי נחלתם ויבאו אלי׃ ⁵ והתחלקו אתה לשׁבעה חלקים יהודה יעמד על גבולו מנגב ובית יוסף יעמדו על גבולם מצפון׃ ⁶ ואתם תכתבו את הארץ שׁבעה חלקים והבאתם אלי הנה ויריתי לכם גורל פה לפני יהוה אלהינו׃ ⁷ כי אין חלק ללוים בקרבכם כי כהנת יהוה נחלתו וגד וראובן וחצי שׁבט המנשׁה לקחו נחלתם מעבר לירדן מזרחה אשׁר נתן להם משׁה עבד יהוה׃ ⁸ ויקמו האנשׁים וילכו ויצו יהושׁע את ההלכים לכתב את הארץ לאמר לכו והתהלכו בארץ וכתבו אותה ושׁובו אלי ופה אשׁליך לכם גורל לפני יהוה בשׁלה׃ ⁹ וילכו האנשׁים ויעברו בארץ ויכתבוה לערים לשׁבעה חלקים על ספר ויבאו אל יהושׁע אל המחנה שׁלה׃ ¹⁰ וישׁלך להם יהושׁע גורל בשׁלה לפני יהוה ויחלק שׁם יהושׁע את הארץ לבני ישׂראל כמחלקתם׃ ¹¹ ויעל גורל מטה בני בנימן למשׁפחתם ויצא גבול גורלם בין בני יהודה ובין בני יוסף׃ ¹² ויהי להם הגבול לפאת צפונה מן הירדן ועלה הגבול אל כתף יריחו מצפון ועלה בהר ימה והיה תצאתיו מדברה בית און׃ ¹³ ועבר משׁם הגבול לוזה אל כתף לוזה נגבה היא בית אל וירד הגבול עטרות אדר על ההר אשׁר מנגב לבית חרון תחתון׃ ¹⁴ ותאר הגבול ונסב לפאת ים נגבה מן ההר אשׁר על פני בית חרון נגבה והיה תצאתיו אל קרית בעל היא קרית יערים עיר בני יהודה זאת פאת ים׃ ¹⁵ ופאת נגבה מקצה קרית יערים ויצא הגבול ימה ויצא אל מעין מי נפתוח׃ ¹⁶ וירד הגבול אל קצה ההר אשׁר על פני גי בן הנם אשׁר בעמק רפאים צפונה וירד גי הנם אל כתף היבוסי נגבה וירד עין רגל׃ ¹⁷ ותאר מצפון ויצא עין שׁמשׁ ויצא אל גלילות אשׁר נכח מעלה אדמים וירד אבן בהן בן ראובן׃ ¹⁸ ועבר אל כתף מול הערבה צפונה וירד הערבתה׃ ¹⁹ ועבר הגבול אל כתף בית חגלה צפונה והיה תצאותיו הגבול אל לשׁון ים המלח צפונה אל קצה הירדן נגבה זה גבול נגב׃ ²⁰ והירדן יגבל אתו לפאת קדמה זאת נחלת בני בנימן לגבולתיה סביב למשׁפחתם׃ ²¹ והיו הערים למטה בני בנימן למשׁפחותיהם יריחו ובית חגלה ועמק קציץ׃ ²² ובית הערבה וצמרים ובית אל׃ ²³ והעוים והפרה ועפרה׃ ²⁴ וכפר העמני והעפני וגבע ערים שׁתים עשׂרה וחצריהן׃ ²⁵ גבעון והרמה ובארות׃ ²⁶ והמצפה והכפירה והמצה׃ ²⁷ ורקם וירפאל ותראלה׃ ²⁸ וצלע האלף והיבוסי היא ירושׁלם גבעת קרית ערים ארבע עשׂרה וחצריהן זאת נחלת בני בנימן למשׁפחתם׃