Isaiah 28 הוי עטרת גאות שׁכרי אפרים וציץ נבל צבי תפארתו אשׁר על ראשׁ גיא שׁמנים הלומי יין׃

HOT⁽ⁱ⁾ ¹ הוי עטרת גאות שׁכרי אפרים וציץ נבל צבי תפארתו אשׁר על ראשׁ גיא שׁמנים הלומי יין׃ ² הנה חזק ואמץ לאדני כזרם ברד שׂער קטב כזרם מים כבירים שׁטפים הניח לארץ ביד׃ ³ ברגלים תרמסנה עטרת גאות שׁכורי אפרים׃ ⁴ והיתה ציצת נבל צבי תפארתו אשׁר על ראשׁ גיא שׁמנים כבכורה בטרם קיץ אשׁר יראה הראה אותה בעודה בכפו יבלענה׃ ⁵ ביום ההוא יהיה יהוה צבאות לעטרת צבי ולצפירת תפארה לשׁאר עמו׃ ⁶ ולרוח משׁפט ליושׁב על המשׁפט ולגבורה משׁיבי מלחמה שׁערה׃ ⁷ וגם אלה ביין שׁגו ובשׁכר תעו כהן ונביא שׁגו בשׁכר נבלעו מן היין תעו מן השׁכר שׁגו בראה פקו פליליה׃ ⁸ כי כל שׁלחנות מלאו קיא צאה בלי מקום׃ ⁹ את מי יורה דעה ואת מי יבין שׁמועה גמולי מחלב עתיקי משׁדים׃ ¹⁰ כי צו לצו צו לצו קו לקו קו לקו זעיר שׁם זעיר שׁם׃ ¹¹ כי בלעגי שׂפה ובלשׁון אחרת ידבר אל העם הזה׃ ¹² אשׁר אמר אליהם זאת המנוחה הניחו לעיף וזאת המרגעה ולא אבוא שׁמוע׃ ¹³ והיה להם דבר יהוה צו לצו צו לצו קו לקו קו לקו זעיר שׁם זעיר שׁם למען ילכו וכשׁלו אחור ונשׁברו ונוקשׁו ונלכדו׃ ¹⁴ לכן שׁמעו דבר יהוה אנשׁי לצון משׁלי העם הזה אשׁר בירושׁלם׃ ¹⁵ כי אמרתם כרתנו ברית את מות ועם שׁאול עשׂינו חזה שׁיט שׁוטף כי עבר לא יבואנו כי שׂמנו כזב מחסנו ובשׁקר נסתרנו׃ ¹⁶ לכן כה אמר אדני יהוה הנני יסד בציון אבן אבן בחן פנת יקרת מוסד מוסד המאמין לא יחישׁ׃ ¹⁷ ושׂמתי משׁפט לקו וצדקה למשׁקלת ויעה ברד מחסה כזב וסתר מים ישׁטפו׃ ¹⁸ וכפר בריתכם את מות וחזותכם את שׁאול לא תקום שׁוט שׁוטף כי יעבר והייתם לו למרמס׃ ¹⁹ מדי עברו יקח אתכם כי בבקר בבקר יעבר ביום ובלילה והיה רק זועה הבין שׁמועה׃ ²⁰ כי קצר המצע מהשׂתרע והמסכה צרה כהתכנס׃ ²¹ כי כהר פרצים יקום יהוה כעמק בגבעון ירגז לעשׂות מעשׂהו זר מעשׂהו ולעבד עבדתו נכריה עבדתו׃ ²² ועתה אל תתלוצצו פן יחזקו מוסריכם כי כלה ונחרצה שׁמעתי מאת אדני יהוה צבאות על כל הארץ׃ ²³ האזינו ושׁמעו קולי הקשׁיבו ושׁמעו אמרתי׃ ²⁴ הכל היום יחרשׁ החרשׁ לזרע יפתח וישׂדד אדמתו׃ ²⁵ הלוא אם שׁוה פניה והפיץ קצח וכמן יזרק ושׂם חטה שׂורה ושׂערה נסמן וכסמת גבלתו׃ ²⁶ ויסרו למשׁפט אלהיו יורנו׃ ²⁷ כי לא בחרוץ יודשׁ קצח ואופן עגלה על כמן יוסב כי במטה יחבט קצח וכמן בשׁבט׃ ²⁸ לחם יודק כי לא לנצח אדושׁ ידושׁנו והמם גלגל עגלתו ופרשׁיו לא ידקנו׃ ²⁹ גם זאת מעם יהוה צבאות יצאה הפליא עצה הגדיל תושׁיה׃