Genesis 38 ויהי בעת ההוא וירד יהודה מאת אחיו ויט עד אישׁ עדלמי ושׁמו חירה׃

HOT⁽ⁱ⁾ ¹ ויהי בעת ההוא וירד יהודה מאת אחיו ויט עד אישׁ עדלמי ושׁמו חירה׃ ² וירא שׁם יהודה בת אישׁ כנעני ושׁמו שׁוע ויקחה ויבא אליה׃ ³ ותהר ותלד בן ויקרא את שׁמו ער׃ ⁴ ותהר עוד ותלד בן ותקרא את שׁמו אונן׃ ⁵ ותסף עוד ותלד בן ותקרא את שׁמו שׁלה והיה בכזיב בלדתה אתו׃ ⁶ ויקח יהודה אשׁה לער בכורו ושׁמה תמר׃ ⁷ ויהי ער בכור יהודה רע בעיני יהוה וימתהו יהוה׃ ⁸ ויאמר יהודה לאונן בא אל אשׁת אחיך ויבם אתה והקם זרע לאחיך׃ ⁹ וידע אונן כי לא לו יהיה הזרע והיה אם בא אל אשׁת אחיו ושׁחת ארצה לבלתי נתן זרע לאחיו׃ ¹⁰ וירע בעיני יהוה אשׁר עשׂה וימת גם אתו׃ ¹¹ ויאמר יהודה לתמר כלתו שׁבי אלמנה בית אביך עד יגדל שׁלה בני כי אמר פן ימות גם הוא כאחיו ותלך תמר ותשׁב בית אביה׃ ¹² וירבו הימים ותמת בת שׁוע אשׁת יהודה וינחם יהודה ויעל על גזזי צאנו הוא וחירה רעהו העדלמי תמנתה׃ ¹³ ויגד לתמר לאמר הנה חמיך עלה תמנתה לגז צאנו׃ ¹⁴ ותסר בגדי אלמנותה מעליה ותכס בצעיף ותתעלף ותשׁב בפתח עינים אשׁר על דרך תמנתה כי ראתה כי גדל שׁלה והוא לא נתנה לו לאשׁה׃ ¹⁵ ויראה יהודה ויחשׁבה לזונה כי כסתה פניה׃ ¹⁶ ויט אליה אל הדרך ויאמר הבה נא אבוא אליך כי לא ידע כי כלתו הוא ותאמר מה תתן לי כי תבוא אלי׃ ¹⁷ ויאמר אנכי אשׁלח גדי עזים מן הצאן ותאמר אם תתן ערבון עד שׁלחך׃ ¹⁸ ויאמר מה הערבון אשׁר אתן לך ותאמר חתמך ופתילך ומטך אשׁר בידך ויתן לה ויבא אליה ותהר׃ ¹⁹ ותקם ותלך ותסר צעיפה מעליה ותלבשׁ בגדי אלמנותה׃ ²⁰ וישׁלח יהודה את גדי העזים ביד רעהו העדלמי לקחת הערבון מיד האשׁה ולא מצאה׃ ²¹ וישׁאל את אנשׁי מקמה לאמר איה הקדשׁה הוא בעינים על הדרך ויאמרו לא היתה בזה קדשׁה׃ ²² וישׁב אל יהודה ויאמר לא מצאתיה וגם אנשׁי המקום אמרו לא היתה בזה קדשׁה׃ ²³ ויאמר יהודה תקח לה פן נהיה לבוז הנה שׁלחתי הגדי הזה ואתה לא מצאתה׃ ²⁴ ויהי כמשׁלשׁ חדשׁים ויגד ליהודה לאמר זנתה תמר כלתך וגם הנה הרה לזנונים ויאמר יהודה הוציאוה ותשׂרף׃ ²⁵ הוא מוצאת והיא שׁלחה אל חמיה לאמר לאישׁ אשׁר אלה לו אנכי הרה ותאמר הכר נא למי החתמת והפתילים והמטה האלה׃ ²⁶ ויכר יהודה ויאמר צדקה ממני כי על כן לא נתתיה לשׁלה בני ולא יסף עוד לדעתה׃ ²⁷ ויהי בעת לדתה והנה תאומים בבטנה׃ ²⁸ ויהי בלדתה ויתן יד ותקח המילדת ותקשׁר על ידו שׁני לאמר זה יצא ראשׁנה׃ ²⁹ ויהי כמשׁיב ידו והנה יצא אחיו ותאמר מה פרצת עליך פרץ ויקרא שׁמו פרץ׃ ³⁰ ואחר יצא אחיו אשׁר על ידו השׁני ויקרא שׁמו זרח׃