Ezekiel 40

HOT^{(i) 1} בעשׂרים וחמשׁ שׁנה לגלותנו בראשׁ השׁנה בעשׂור לחדשׁ בארבע עשׂרה שׁנה אחר אשׁר הכתה העיר בעצם היום הזה היתה עלי יד יהוה ויבא אתי שׁמה׃ ² במראות אלהים הביאני אל ארץ ישׂראל ויניחני אל הר גבה מאד ועליו כמבנה עיר מנגב׃ ³ ויביא אותי שׁמה והנה אישׁ מראהו כמראה נחשׁת ופתיל פשׁתים בידו וקנה המדה והוא עמד בשׁער׃ ⁴ וידבר אלי האישׁ בן אדם ראה בעיניך ובאזניך שׁמע ושׂים לבך לכל אשׁר אני מראה אותך כי למען הראותכה הבאתה הנה הגד את כל אשׁר אתה ראה לבית ישׂראל׃ ⁵ והנה חומה מחוץ לבית סביב סביב וביד האישׁ קנה המדה שׁשׁ אמות באמה וטפח וימד את רחב הבנין קנה אחד וקומה קנה אחד׃ ⁶ ויבוא אל שׁער אשׁר פניו דרך הקדימה ויעל במעלותו וימד את סף השׁער קנה אחד רחב ואת סף אחד קנה אחד רחב׃ ⁷ והתא קנה אחד ארך וקנה אחד רחב ובין התאים חמשׁ אמות וסף השׁער מאצל אולם השׁער מהבית קנה אחד׃ ⁸ וימד את אלם השׁער מהבית קנה אחד׃ ⁹ וימד את אלם השׁער שׁמנה אמות ואילו שׁתים אמות ואלם השׁער מהבית׃ ¹⁰ ותאי השׁער דרך הקדים שׁלשׁה מפה ושׁלשׁה מפה מדה אחת לשׁלשׁתם ומדה אחת לאילם מפה ומפו׃ ¹¹ וימד את רחב פתח השׁער עשׂר אמות ארך השׁער שׁלושׁ עשׂרה אמות׃ ¹² וגבול לפני התאות אמה אחת ואמה אחת גבול מפה והתא שׁשׁ אמות מפו ושׁשׁ אמות מפו׃ ¹³ וימד את השׁער מגג התא לגגו רחב עשׂרים וחמשׁ אמות פתח נגד פתח׃ ¹⁴ ויעשׂ את אילים שׁשׁים אמה ואל איל החצר השׁער סביב סביב׃ ¹⁵ ועל פני השׁער היאתון על לפני אלם השׁער הפנימי חמשׁים אמה׃ ¹⁶ וחלנות אטמות אל התאים ואל אליהמה לפנימה לשׁער סביב סביב וכן לאלמות וחלונות סביב סביב לפנימה ואל איל תמרים׃ ¹⁷ ויביאני אל החצר החיצונה והנה לשׁכות ורצפה עשׂוי לחצר סביב סביב שׁלשׁים לשׁכות אל הרצפה׃ ¹⁸ והרצפה אל כתף השׁערים לעמת ארך השׁערים הרצפה התחתונה׃ ¹⁹ וימד רחב מלפני השׁער התחתונה לפני החצר הפנימי מחוץ מאה אמה הקדים והצפון׃ ²⁰ והשׁער אשׁר פניו דרך הצפון לחצר החיצונה מדד ארכו ורחבו׃ ²¹ ותאו שׁלושׁה מפו ושׁלשׁה מפו ואילו ואלמו היה כמדת השׁער הראשׁון חמשׁים אמה ארכו ורחב חמשׁ ועשׂרים באמה׃ ²² וחלונו ואלמו ותמרו כמדת השׁער אשׁר פניו דרך הקדים ובמעלות שׁבע יעלו בו ואילמו לפניהם׃ ²³ ושׁער לחצר הפנימי נגד השׁער לצפון ולקדים וימד משׁער אל שׁער מאה אמה׃ ²⁴ ויולכני דרך הדרום והנה שׁער דרך הדרום ומדד אילו ואילמו כמדות האלה׃ ²⁵ וחלונים לו ולאילמו סביב סביב כהחלנות האלה חמשׁים אמה ארך ורחב חמשׁ ועשׂרים אמה׃ ²⁶ ומעלות שׁבעה עלותו ואלמו לפניהם ותמרים לו אחד מפו ואחד מפו אל אילו׃ ²⁷ ושׁער לחצר הפנימי דרך הדרום וימד משׁער אל השׁער דרך הדרום מאה אמות׃ ²⁸ ויביאני אל חצר הפנימי בשׁער הדרום וימד את השׁער הדרום כמדות האלה׃ ²⁹ ותאו ואילו ואלמו כמדות האלה וחלונות לו ולאלמו סביב סביב חמשׁים אמה ארך ורחב עשׂרים וחמשׁ אמות׃ ³⁰ ואלמות סביב סביב ארך חמשׁ ועשׂרים אמה ורחב חמשׁ אמות׃ ³¹ ואלמו אל חצר החצונה ותמרים אל אילו ומעלות שׁמונה מעלו׃ ³² ויביאני אל החצר הפנימי דרך הקדים וימד את השׁער כמדות האלה׃ ³³ ותאו ואלו ואלמו כמדות האלה וחלונות לו ולאלמו סביב סביב ארך חמשׁים אמה ורחב חמשׁ ועשׂרים אמה׃ ³⁴ ואלמו לחצר החיצונה ותמרים אל אלו מפו ומפו ושׁמנה מעלות מעלו׃ ³⁵ ויביאני אל שׁער הצפון ומדד כמדות האלה׃ ³⁶ תאו אלו ואלמו וחלונות לו סביב סביב ארך חמשׁים אמה ורחב חמשׁ ועשׂרים אמה׃ ³⁷ ואילו לחצר החיצונה ותמרים אל אילו מפו ומפו ושׁמנה מעלות מעלו׃ ³⁸ ולשׁכה ופתחה באילים השׁערים שׁם ידיחו את העלה׃ ³⁹ ובאלם השׁער שׁנים שׁלחנות מפו ושׁנים שׁלחנות מפה לשׁחוט אליהם העולה והחטאת והאשׁם׃ ⁴⁰ ואל הכתף מחוצה לעולה לפתח השׁער הצפונה שׁנים שׁלחנות ואל הכתף האחרת אשׁר לאלם השׁער שׁנים שׁלחנות׃ ⁴¹ ארבעה שׁלחנות מפה וארבעה שׁלחנות מפה לכתף השׁער שׁמונה שׁלחנות אליהם ישׁחטו׃ ⁴² וארבעה שׁלחנות לעולה אבני גזית ארך אמה אחת וחצי ורחב אמה אחת וחצי וגבה אמה אחת אליהם ויניחו את הכלים אשׁר ישׁחטו את העולה בם והזבח׃ ⁴³ והשׁפתים טפח אחד מוכנים בבית סביב סביב ואל השׁלחנות בשׂר הקרבן׃ ⁴⁴ ומחוצה לשׁער הפנימי לשׁכות שׁרים בחצר הפנימי אשׁר אל כתף שׁער הצפון ופניהם דרך הדרום אחד אל כתף שׁער הקדים פני דרך הצפן׃ ⁴⁵ וידבר אלי זה הלשׁכה אשׁר פניה דרך הדרום לכהנים שׁמרי משׁמרת הבית׃ ⁴⁶ והלשׁכה אשׁר פניה דרך הצפון לכהנים שׁמרי משׁמרת המזבח המה בני צדוק הקרבים מבני לוי אל יהוה לשׁרתו׃ ⁴⁷ וימד את החצר ארך מאה אמה ורחב מאה אמה מרבעת והמזבח לפני הבית׃ ⁴⁸ ויבאני אל אלם הבית וימד אל אלם חמשׁ אמות מפה וחמשׁ אמות מפה ורחב השׁער שׁלשׁ אמות מפו ושׁלשׁ אמות מפו׃ ⁴⁹ ארך האלם עשׂרים אמה ורחב עשׁתי עשׂרה אמה ובמעלות אשׁר יעלו אליו ועמדים אל האילים אחד מפה ואחד מפה׃