Exodus 36 ועשׂה בצלאל ואהליאב וכל אישׁ חכם לב אשׁר נתן יהוה חכמה ותבונה בהמה לדעת לעשׂת את כל מלאכת עבדת הקדשׁ לכל אשׁר צוה יהוה׃

HOT⁽ⁱ⁾ ¹ ועשׂה בצלאל ואהליאב וכל אישׁ חכם לב אשׁר נתן יהוה חכמה ותבונה בהמה לדעת לעשׂת את כל מלאכת עבדת הקדשׁ לכל אשׁר צוה יהוה׃ ² ויקרא משׁה אל בצלאל ואל אהליאב ואל כל אישׁ חכם לב אשׁר נתן יהוה חכמה בלבו כל אשׁר נשׂאו לבו לקרבה אל המלאכה לעשׂת אתה׃ ³ ויקחו מלפני משׁה את כל התרומה אשׁר הביאו בני ישׂראל למלאכת עבדת הקדשׁ לעשׂת אתה והם הביאו אליו עוד נדבה בבקר בבקר׃ ⁴ ויבאו כל החכמים העשׂים את כל מלאכת הקדשׁ אישׁ אישׁ ממלאכתו אשׁר המה עשׂים׃ ⁵ ויאמרו אל משׁה לאמר מרבים העם להביא מדי העבדה למלאכה אשׁר צוה יהוה לעשׂת אתה׃ ⁶ ויצו משׁה ויעבירו קול במחנה לאמר אישׁ ואשׁה אל יעשׂו עוד מלאכה לתרומת הקדשׁ ויכלא העם מהביא׃ ⁷ והמלאכה היתה דים לכל המלאכה לעשׂות אתה והותר׃ ⁸ ויעשׂו כל חכם לב בעשׂי המלאכה את המשׁכן עשׂר יריעת שׁשׁ משׁזר ותכלת וארגמן ותולעת שׁני כרבים מעשׂה חשׁב עשׂה אתם׃ ⁹ ארך היריעה האחת שׁמנה ועשׂרים באמה ורחב ארבע באמה היריעה האחת מדה אחת לכל היריעת׃ ¹⁰ ויחבר את חמשׁ היריעת אחת אל אחת וחמשׁ יריעת חבר אחת אל אחת׃ ¹¹ ויעשׂ ללאת תכלת על שׂפת היריעה האחת מקצה במחברת כן עשׂה בשׂפת היריעה הקיצונה במחברת השׁנית׃ ¹² חמשׁים ללאת עשׂה ביריעה האחת וחמשׁים ללאת עשׂה בקצה היריעה אשׁר במחברת השׁנית מקבילת הללאת אחת אל אחת׃ ¹³ ויעשׂ חמשׁים קרסי זהב ויחבר את היריעת אחת אל אחת בקרסים ויהי המשׁכן אחד׃ ¹⁴ ויעשׂ יריעת עזים לאהל על המשׁכן עשׁתי עשׂרה יריעת עשׂה אתם׃ ¹⁵ ארך היריעה האחת שׁלשׁים באמה וארבע אמות רחב היריעה האחת מדה אחת לעשׁתי עשׂרה יריעת׃ ¹⁶ ויחבר את חמשׁ היריעת לבד ואת שׁשׁ היריעת לבד׃ ¹⁷ ויעשׂ ללאת חמשׁים על שׂפת היריעה הקיצנה במחברת וחמשׁים ללאת עשׂה על שׂפת היריעה החברת השׁנית׃ ¹⁸ ויעשׂ קרסי נחשׁת חמשׁים לחבר את האהל להית אחד׃ ¹⁹ ויעשׂ מכסה לאהל ערת אילם מאדמים ומכסה ערת תחשׁים מלמעלה׃ ²⁰ ויעשׂ את הקרשׁים למשׁכן עצי שׁטים עמדים׃ ²¹ עשׂר אמת ארך הקרשׁ ואמה וחצי האמה רחב הקרשׁ האחד׃ ²² שׁתי ידת לקרשׁ האחד משׁלבת אחת אל אחת כן עשׂה לכל קרשׁי המשׁכן׃ ²³ ויעשׂ את הקרשׁים למשׁכן עשׂרים קרשׁים לפאת נגב תימנה׃ ²⁴ וארבעים אדני כסף עשׂה תחת עשׂרים הקרשׁים שׁני אדנים תחת הקרשׁ האחד לשׁתי ידתיו ושׁני אדנים תחת הקרשׁ האחד לשׁתי ידתיו׃ ²⁵ ולצלע המשׁכן השׁנית לפאת צפון עשׂה עשׂרים קרשׁים׃ ²⁶ וארבעים אדניהם כסף שׁני אדנים תחת הקרשׁ האחד ושׁני אדנים תחת הקרשׁ האחד׃ ²⁷ ולירכתי המשׁכן ימה עשׂה שׁשׁה קרשׁים׃ ²⁸ ושׁני קרשׁים עשׂה למקצעת המשׁכן בירכתים׃ ²⁹ והיו תואמם מלמטה ויחדו יהיו תמים אל ראשׁו אל הטבעת האחת כן עשׂה לשׁניהם לשׁני המקצעת׃ ³⁰ והיו שׁמנה קרשׁים ואדניהם כסף שׁשׁה עשׂר אדנים שׁני אדנים שׁני אדנים תחת הקרשׁ האחד׃ ³¹ ויעשׂ בריחי עצי שׁטים חמשׁה לקרשׁי צלע המשׁכן האחת׃ ³² וחמשׁה בריחם לקרשׁי צלע המשׁכן השׁנית וחמשׁה בריחם לקרשׁי המשׁכן לירכתים ימה׃ ³³ ויעשׂ את הבריח התיכן לברח בתוך הקרשׁים מן הקצה אל הקצה׃ ³⁴ ואת הקרשׁים צפה זהב ואת טבעתם עשׂה זהב בתים לבריחם ויצף את הבריחם זהב׃ ³⁵ ויעשׂ את הפרכת תכלת וארגמן ותולעת שׁני ושׁשׁ משׁזר מעשׂה חשׁב עשׂה אתה כרבים׃ ³⁶ ויעשׂ לה ארבעה עמודי שׁטים ויצפם זהב וויהם זהב ויצק להם ארבעה אדני כסף׃ ³⁷ ויעשׂ מסך לפתח האהל תכלת וארגמן ותולעת שׁני ושׁשׁ משׁזר מעשׂה רקם׃ ³⁸ ואת עמודיו חמשׁה ואת וויהם וצפה ראשׁיהם וחשׁקיהם זהב ואדניהם חמשׁה נחשׁת׃