Exodus 28 ואתה הקרב אליך את אהרן אחיך ואת בניו אתו מתוך בני ישׂראל לכהנו לי אהרן נדב ואביהוא אלעזר ואיתמר בני אהרן׃

HOT⁽ⁱ⁾ ¹ ואתה הקרב אליך את אהרן אחיך ואת בניו אתו מתוך בני ישׂראל לכהנו לי אהרן נדב ואביהוא אלעזר ואיתמר בני אהרן׃ ² ועשׂית בגדי קדשׁ לאהרן אחיך לכבוד ולתפארת׃ ³ ואתה תדבר אל כל חכמי לב אשׁר מלאתיו רוח חכמה ועשׂו את בגדי אהרן לקדשׁו לכהנו׃ ⁴ ואלה הבגדים אשׁר יעשׂו חשׁן ואפוד ומעיל וכתנת תשׁבץ מצנפת ואבנט ועשׂו בגדי קדשׁ לאהרן אחיך ולבניו לכהנו׃ ⁵ והם יקחו את הזהב ואת התכלת ואת הארגמן ואת תולעת השׁני ואת השׁשׁ׃ ⁶ ועשׂו את האפד זהב תכלת וארגמן תולעת שׁני ושׁשׁ משׁזר מעשׂה חשׁב׃ ⁷ שׁתי כתפת חברת יהיה לו אל שׁני קצותיו וחבר׃ ⁸ וחשׁב אפדתו אשׁר עליו כמעשׂהו ממנו יהיה זהב תכלת וארגמן ותולעת שׁני ושׁשׁ משׁזר׃ ⁹ ולקחת את שׁתי אבני שׁהם ופתחת עליהם שׁמות בני ישׂראל׃ ¹⁰ שׁשׁה משׁמתם על האבן האחת ואת שׁמות השׁשׁה הנותרים על האבן השׁנית כתולדתם׃ ¹¹ מעשׂה חרשׁ אבן פתוחי חתם תפתח את שׁתי האבנים על שׁמת בני ישׂראל מסבת משׁבצות זהב תעשׂה אתם׃ ¹² ושׂמת את שׁתי האבנים על כתפת האפד אבני זכרן לבני ישׂראל ונשׂא אהרן את שׁמותם לפני יהוה על שׁתי כתפיו לזכרן׃ ¹³ ועשׂית משׁבצת זהב׃ ¹⁴ ושׁתי שׁרשׁרת זהב טהור מגבלת תעשׂה אתם מעשׂה עבת ונתתה את שׁרשׁרת העבתת על המשׁבצת׃ ¹⁵ ועשׂית חשׁן משׁפט מעשׂה חשׁב כמעשׂה אפד תעשׂנו זהב תכלת וארגמן ותולעת שׁני ושׁשׁ משׁזר תעשׂה אתו׃ ¹⁶ רבוע יהיה כפול זרת ארכו וזרת רחבו׃ ¹⁷ ומלאת בו מלאת אבן ארבעה טורים אבן טור אדם פטדה וברקת הטור האחד׃ ¹⁸ והטור השׁני נפך ספיר ויהלם׃ ¹⁹ והטור השׁלישׁי לשׁם שׁבו ואחלמה׃ ²⁰ והטור הרביעי תרשׁישׁ ושׁהם וישׁפה משׁבצים זהב יהיו במלואתם׃ ²¹ והאבנים תהיין על שׁמת בני ישׂראל שׁתים עשׂרה על שׁמתם פתוחי חותם אישׁ על שׁמו תהיין לשׁני עשׂר שׁבט׃ ²² ועשׂית על החשׁן שׁרשׁת גבלת מעשׂה עבת זהב טהור׃ ²³ ועשׂית על החשׁן שׁתי טבעות זהב ונתת את שׁתי הטבעות על שׁני קצות החשׁן׃ ²⁴ ונתתה את שׁתי עבתת הזהב על שׁתי הטבעת אל קצות החשׁן׃ ²⁵ ואת שׁתי קצות שׁתי העבתת תתן על שׁתי המשׁבצות ונתתה על כתפות האפד אל מול פניו׃ ²⁶ ועשׂית שׁתי טבעות זהב ושׂמת אתם על שׁני קצות החשׁן על שׂפתו אשׁר אל עבר האפוד ביתה׃ ²⁷ ועשׂית שׁתי טבעות זהב ונתתה אתם על שׁתי כתפות האפוד מלמטה ממול פניו לעמת מחברתו ממעל לחשׁב האפוד׃ ²⁸ וירכסו את החשׁן מטבעתו אל טבעת האפוד בפתיל תכלת להיות על חשׁב האפוד ולא יזח החשׁן מעל האפוד׃ ²⁹ ונשׂא אהרן את שׁמות בני ישׂראל בחשׁן המשׁפט על לבו בבאו אל הקדשׁ לזכרן לפני יהוה תמיד׃ ³⁰ ונתת אל חשׁן המשׁפט את האורים ואת התמים והיו על לב אהרן בבאו לפני יהוה ונשׂא אהרן את משׁפט בני ישׂראל על לבו לפני יהוה תמיד׃ ³¹ ועשׂית את מעיל האפוד כליל תכלת׃ ³² והיה פי ראשׁו בתוכו שׂפה יהיה לפיו סביב מעשׂה ארג כפי תחרא יהיה לו לא יקרע׃ ³³ ועשׂית על שׁוליו רמני תכלת וארגמן ותולעת שׁני על שׁוליו סביב ופעמני זהב בתוכם סביב׃ ³⁴ פעמן זהב ורמון פעמן זהב ורמון על שׁולי המעיל סביב׃ ³⁵ והיה על אהרן לשׁרת ונשׁמע קולו בבאו אל הקדשׁ לפני יהוה ובצאתו ולא ימות׃ ³⁶ ועשׂית ציץ זהב טהור ופתחת עליו פתוחי חתם קדשׁ ליהוה׃ ³⁷ ושׂמת אתו על פתיל תכלת והיה על המצנפת אל מול פני המצנפת יהיה׃ ³⁸ והיה על מצח אהרן ונשׂא אהרן את עון הקדשׁים אשׁר יקדישׁו בני ישׂראל לכל מתנת קדשׁיהם והיה על מצחו תמיד לרצון להם לפני יהוה׃ ³⁹ ושׁבצת הכתנת שׁשׁ ועשׂית מצנפת שׁשׁ ואבנט תעשׂה מעשׂה רקם׃ ⁴⁰ ולבני אהרן תעשׂה כתנת ועשׂית להם אבנטים ומגבעות תעשׂה להם לכבוד ולתפארת׃ ⁴¹ והלבשׁת אתם את אהרן אחיך ואת בניו אתו ומשׁחת אתם ומלאת את ידם וקדשׁת אתם וכהנו׃ ⁴² ועשׂה להם מכנסי בד לכסות בשׂר ערוה ממתנים ועד ירכים יהיו׃ ⁴³ והיו על אהרן ועל בניו בבאם אל אהל מועד או בגשׁתם אל המזבח לשׁרת בקדשׁ ולא ישׂאו עון ומתו חקת עולם לו ולזרעו אחריו׃