Exodus 21 ואלה המשׁפטים אשׁר תשׂים לפניהם׃

HOT⁽ⁱ⁾ ¹ ואלה המשׁפטים אשׁר תשׂים לפניהם׃ ² כי תקנה עבד עברי שׁשׁ שׁנים יעבד ובשׁבעת יצא לחפשׁי חנם׃ ³ אם בגפו יבא בגפו יצא אם בעל אשׁה הוא ויצאה אשׁתו עמו׃ ⁴ אם אדניו יתן לו אשׁה וילדה לו בנים או בנות האשׁה וילדיה תהיה לאדניה והוא יצא בגפו׃ ⁵ ואם אמר יאמר העבד אהבתי את אדני את אשׁתי ואת בני לא אצא חפשׁי׃ ⁶ והגישׁו אדניו אל האלהים והגישׁו אל הדלת או אל המזוזה ורצע אדניו את אזנו במרצע ועבדו לעלם׃ ⁷ וכי ימכר אישׁ את בתו לאמה לא תצא כצאת העבדים׃ ⁸ אם רעה בעיני אדניה אשׁר לא יעדה והפדה לעם נכרי לא ימשׁל למכרה בבגדו׃ ⁹ ואם לבנו ייעדנה כמשׁפט הבנות יעשׂה׃ ¹⁰ אם אחרת יקח לו שׁארה כסותה וענתה לא יגרע׃ ¹¹ ואם שׁלשׁ אלה לא יעשׂה לה ויצאה חנם אין כסף׃ ¹² מכה אישׁ ומת מות יומת׃ ¹³ ואשׁר לא צדה והאלהים אנה לידו ושׂמתי לך מקום אשׁר ינוס שׁמה׃ ¹⁴ וכי יזד אישׁ על רעהו להרגו בערמה מעם מזבחי תקחנו למות׃ ¹⁵ ומכה אביו ואמו מות יומת׃ ¹⁶ וגנב אישׁ ומכרו ונמצא בידו מות יומת׃ ¹⁷ ומקלל אביו ואמו מות יומת׃ ¹⁸ וכי יריבן אנשׁים והכה אישׁ את רעהו באבן או באגרף ולא ימות ונפל למשׁכב׃ ¹⁹ אם יקום והתהלך בחוץ על משׁענתו ונקה המכה רק שׁבתו יתן ורפא ירפא׃ ²⁰ וכי יכה אישׁ את עבדו או את אמתו בשׁבט ומת תחת ידו נקם ינקם׃ ²¹ אך אם יום או יומים יעמד לא יקם כי כספו הוא׃ ²² וכי ינצו אנשׁים ונגפו אשׁה הרה ויצאו ילדיה ולא יהיה אסון ענושׁ יענשׁ כאשׁר ישׁית עליו בעל האשׁה ונתן בפללים׃ ²³ ואם אסון יהיה ונתתה נפשׁ תחת נפשׁ׃ ²⁴ עין תחת עין שׁן תחת שׁן יד תחת יד רגל תחת רגל׃ ²⁵ כויה תחת כויה פצע תחת פצע חבורה תחת חבורה׃ ²⁶ וכי יכה אישׁ את עין עבדו או את עין אמתו ושׁחתה לחפשׁי ישׁלחנו תחת עינו׃ ²⁷ ואם שׁן עבדו או שׁן אמתו יפיל לחפשׁי ישׁלחנו תחת שׁנו׃ ²⁸ וכי יגח שׁור את אישׁ או את אשׁה ומת סקול יסקל השׁור ולא יאכל את בשׂרו ובעל השׁור נקי׃ ²⁹ ואם שׁור נגח הוא מתמל שׁלשׁם והועד בבעליו ולא ישׁמרנו והמית אישׁ או אשׁה השׁור יסקל וגם בעליו יומת׃ ³⁰ אם כפר יושׁת עליו ונתן פדין נפשׁו ככל אשׁר יושׁת עליו׃ ³¹ או בן יגח או בת יגח כמשׁפט הזה יעשׂה׃ ³² אם עבד יגח השׁור או אמה כסף שׁלשׁים שׁקלים יתן לאדניו והשׁור יסקל׃ ³³ וכי יפתח אישׁ בור או כי יכרה אישׁ בר ולא יכסנו ונפל שׁמה שׁור או חמור׃ ³⁴ בעל הבור ישׁלם כסף ישׁיב לבעליו והמת יהיה׃ ³⁵ וכי יגף שׁור אישׁ את שׁור רעהו ומת ומכרו את השׁור החי וחצו את כספו וגם את המת יחצון׃ ³⁶ או נודע כי שׁור נגח הוא מתמול שׁלשׁם ולא ישׁמרנו בעליו שׁלם ישׁלם שׁור תחת השׁור והמת יהיה׃