2 Samuel 22

HOT^{(i) 1} וידבר דוד ליהוה את דברי השׁירה הזאת ביום הציל יהוה אתו מכף כל איביו ומכף שׁאול׃ ² ויאמר יהוה סלעי ומצדתי ומפלטי׃ ³ אלהי צורי אחסה בו מגני וקרן ישׁעי משׂגבי ומנוסי משׁעי מחמס תשׁעני׃ ⁴ מהלל אקרא יהוה ומאיבי אושׁע׃ ⁵ כי אפפני משׁברי מות נחלי בליעל יבעתני׃ ⁶ חבלי שׁאול סבני קדמני מקשׁי מות׃ ⁷ בצר לי אקרא יהוה ואל אלהי אקרא וישׁמע מהיכלו קולי ושׁועתי באזניו׃ ⁸ ותגעשׁ ותרעשׁ הארץ מוסדות השׁמים ירגזו ויתגעשׁו כי חרה׃ ⁹ עלה עשׁן באפו ואשׁ מפיו תאכל גחלים בערו ממנו׃ ¹⁰ ויט שׁמים וירד וערפל תחת רגליו׃ ¹¹ וירכב על כרוב ויעף וירא על כנפי רוח׃ ¹² וישׁת חשׁך סביבתיו סכות חשׁרת מים עבי שׁחקים׃ ¹³ מנגה נגדו בערו גחלי אשׁ׃ ¹⁴ ירעם מן שׁמים יהוה ועליון יתן קולו׃ ¹⁵ וישׁלח חצים ויפיצם ברק ויהמם׃ ¹⁶ ויראו אפקי ים יגלו מסדות תבל בגערת יהוה מנשׁמת רוח אפו׃ ¹⁷ ישׁלח ממרום יקחני ימשׁני ממים רבים׃ ¹⁸ יצילני מאיבי עז משׂנאי כי אמצו ממני׃ ¹⁹ יקדמני ביום אידי ויהי יהוה משׁען׃ ²⁰ ויצא למרחב אתי יחלצני כי חפץ׃ ²¹ יגמלני יהוה כצדקתי כבר ידי ישׁיב׃ ²² כי שׁמרתי דרכי יהוה ולא רשׁעתי מאלהי׃ ²³ כי כל משׁפטו לנגדי וחקתיו לא אסור ממנה׃ ²⁴ ואהיה תמים לו ואשׁתמרה מעוני׃ ²⁵ וישׁב יהוה לי כצדקתי כברי לנגד עיניו׃ ²⁶ עם חסיד תתחסד עם גבור תמים תתמם׃ ²⁷ עם נבר תתבר ועם עקשׁ תתפל׃ ²⁸ ואת עם עני תושׁיע ועיניך על רמים תשׁפיל׃ ²⁹ כי אתה נירי יהוה ויהוה יגיה חשׁכי׃ ³⁰ כי בכה ארוץ גדוד באלהי אדלג שׁור׃ ³¹ האל תמים דרכו אמרת יהוה צרופה מגן הוא לכל החסים׃ ³² כי מי אל מבלעדי יהוה ומי צור מבלעדי אלהינו׃ ³³ האל מעוזי חיל ויתר תמים דרכו׃ ³⁴ משׁוה רגליו כאילות ועל במותי יעמדני׃ ³⁵ מלמד ידי למלחמה ונחת קשׁת נחושׁה זרעתי׃ ³⁶ ותתן לי מגן ישׁעך וענתך תרבני׃ ³⁷ תרחיב צעדי תחתני ולא מעדו קרסלי׃ ³⁸ ארדפה איבי ואשׁמידם ולא אשׁוב עד כלותם׃ ³⁹ ואכלם ואמחצם ולא יקומון ויפלו תחת רגלי׃ ⁴⁰ ותזרני חיל למלחמה תכריע קמי תחתני׃ ⁴¹ ואיבי תתה לי ערף משׂנאי ואצמיתם׃ ⁴² ישׁעו ואין משׁיע אל יהוה ולא ענם׃ ⁴³ ואשׁחקם כעפר ארץ כטיט חוצות אדקם ארקעם׃ ⁴⁴ ותפלטני מריבי עמי תשׁמרני לראשׁ גוים עם לא ידעתי יעבדני׃ ⁴⁵ בני נכר יתכחשׁו לי לשׁמוע אזן ישׁמעו׃ ⁴⁶ בני נכר יבלו ויחגרו ממסגרותם׃ ⁴⁷ חי יהוה וברוך צורי וירם אלהי צור ישׁעי׃ ⁴⁸ האל הנתן נקמת לי ומוריד עמים תחתני׃ ⁴⁹ ומוציאי מאיבי ומקמי תרוממני מאישׁ חמסים תצילני׃ ⁵⁰ על כן אודך יהוה בגוים ולשׁמך אזמר׃ ⁵¹ מגדיל ישׁועות מלכו ועשׂה חסד למשׁיחו לדוד ולזרעו עד עולם׃