2 Chronicles 6:5-11

HOT^{(i) 5} מן היום אשׁר הוצאתי את עמי מארץ מצרים לא בחרתי בעיר מכל שׁבטי ישׂראל לבנות בית להיות שׁמי שׁם ולא בחרתי באישׁ להיות נגיד על עמי ישׂראל׃ ⁶ ואבחר בירושׁלם להיות שׁמי שׁם ואבחר בדויד להיות על עמי ישׂראל׃ ⁷ ויהי עם לבב דויד אבי לבנות בית לשׁם יהוה אלהי ישׂראל׃ ⁸ ויאמר יהוה אל דויד אבי יען אשׁר היה עם לבבך לבנות בית לשׁמי הטיבות כי היה עם לבבך׃ ⁹ רק אתה לא תבנה הבית כי בנך היוצא מחלציך הוא יבנה הבית לשׁמי׃ ¹⁰ ויקם יהוה את דברו אשׁר דבר ואקום תחת דויד אבי ואשׁב על כסא ישׂראל כאשׁר דבר יהוה ואבנה הבית לשׁם יהוה אלהי ישׂראל׃ ¹¹ ואשׂים שׁם את הארון אשׁר שׁם ברית יהוה אשׁר כרת עם בני ישׂראל׃