1 Chronicles 11 ויקבצו כל ישׂראל אל דויד חברונה לאמר הנה עצמך ובשׂרך אנחנו׃

HOT⁽ⁱ⁾ ¹ ויקבצו כל ישׂראל אל דויד חברונה לאמר הנה עצמך ובשׂרך אנחנו׃ ² גם תמול גם שׁלשׁום גם בהיות שׁאול מלך אתה המוציא והמביא את ישׂראל ויאמר יהוה אלהיך לך אתה תרעה את עמי את ישׂראל ואתה תהיה נגיד על עמי ישׂראל׃ ³ ויבאו כל זקני ישׂראל אל המלך חברונה ויכרת להם דויד ברית בחברון לפני יהוה וימשׁחו את דויד למלך על ישׂראל כדבר יהוה ביד שׁמואל׃ ⁴ וילך דויד וכל ישׂראל ירושׁלם היא יבוס ושׁם היבוסי ישׁבי הארץ׃ ⁵ ויאמרו ישׁבי יבוס לדויד לא תבוא הנה וילכד דויד את מצדת ציון היא עיר דויד׃ ⁶ ויאמר דויד כל מכה יבוסי בראשׁונה יהיה לראשׁ ולשׂר ויעל בראשׁונה יואב בן צרויה ויהי לראשׁ׃ ⁷ וישׁב דויד במצד על כן קראו לו עיר דויד׃ ⁸ ויבן העיר מסביב מן המלוא ועד הסביב ויואב יחיה את שׁאר העיר׃ ⁹ וילך דויד הלוך וגדול ויהוה צבאות עמו׃ ¹⁰ ואלה ראשׁי הגבורים אשׁר לדויד המתחזקים עמו במלכותו עם כל ישׂראל להמליכו כדבר יהוה על ישׂראל׃ ¹¹ ואלה מספר הגברים אשׁר לדויד ישׁבעם בן חכמוני ראשׁ השׁלושׁים הוא עורר את חניתו על שׁלשׁ מאות חלל בפעם אחת׃ ¹² ואחריו אלעזר בן דודו האחוחי הוא בשׁלושׁה הגברים׃ ¹³ הוא היה עם דויד בפס דמים והפלשׁתים נאספו שׁם למלחמה ותהי חלקת השׂדה מלאה שׂעורים והעם נסו מפני פלשׁתים׃ ¹⁴ ויתיצבו בתוך החלקה ויצילוה ויכו את פלשׁתים ויושׁע יהוה תשׁועה גדולה׃ ¹⁵ וירדו שׁלושׁה מן השׁלושׁים ראשׁ על הצר אל דויד אל מערת עדלם ומחנה פלשׁתים חנה בעמק רפאים׃ ¹⁶ ודויד אז במצודה ונציב פלשׁתים אז בבית לחם׃ ¹⁷ ויתאו דויד ויאמר מי ישׁקני מים מבור בית לחם אשׁר בשׁער׃ ¹⁸ ויבקעו השׁלשׁה במחנה פלשׁתים וישׁאבו מים מבור בית לחם אשׁר בשׁער וישׂאו ויבאו אל דויד ולא אבה דויד לשׁתותם וינסך אתם ליהוה׃ ¹⁹ ויאמר חלילה לי מאלהי מעשׂות זאת הדם האנשׁים האלה אשׁתה בנפשׁותם כי בנפשׁותם הביאום ולא אבה לשׁתותם אלה עשׂו שׁלשׁת הגבורים׃ ²⁰ ואבשׁי אחי יואב הוא היה ראשׁ השׁלושׁה והוא עורר את חניתו על שׁלשׁ מאות חלל ולא שׁם בשׁלושׁה׃ ²¹ מן השׁלושׁה בשׁנים נכבד ויהי להם לשׂר ועד השׁלושׁה לא בא׃ ²² בניה בן יהוידע בן אישׁ חיל רב פעלים מן קבצאל הוא הכה את שׁני אריאל מואב והוא ירד והכה את הארי בתוך הבור ביום השׁלג׃ ²³ והוא הכה את האישׁ המצרי אישׁ מדה חמשׁ באמה וביד המצרי חנית כמנור ארגים וירד אליו בשׁבט ויגזל את החנית מיד המצרי ויהרגהו בחניתו׃ ²⁴ אלה עשׂה בניהו בן יהוידע ולו שׁם בשׁלושׁה הגברים׃ ²⁵ מן השׁלושׁים הנו נכבד הוא ואל השׁלושׁה לא בא וישׂימהו דויד על משׁמעתו׃ ²⁶ וגבורי החילים עשׂה אל אחי יואב אלחנן בן דודו מבית לחם׃ ²⁷ שׁמות ההרורי חלץ הפלוני׃ ²⁸ עירא בן עקשׁ התקועי אביעזר הענתותי׃ ²⁹ סבכי החשׁתי עילי האחוחי׃ ³⁰ מהרי הנטפתי חלד בן בענה הנטופתי׃ ³¹ איתי בן ריבי מגבעת בני בנימן בניה הפרעתני׃ ³² חורי מנחלי געשׁ אביאל הערבתי׃ ³³ עזמות הבחרומי אליחבא השׁעלבני׃ ³⁴ בני השׁם הגזוני יונתן בן שׁגה ההררי׃ ³⁵ אחיאם בן שׂכר ההררי אליפל בן אור׃ ³⁶ חפר המכרתי אחיה הפלני׃ ³⁷ חצרו הכרמלי נערי בן אזבי׃ ³⁸ יואל אחי נתן מבחר בן הגרי׃ ³⁹ צלק העמוני נחרי הברתי נשׂא כלי יואב בן צרויה׃ ⁴⁰ עירא היתרי גרב היתרי׃ ⁴¹ אוריה החתי זבד בן אחלי׃ ⁴² עדינא בן שׁיזא הראובני ראשׁ לראובני ועליו שׁלושׁים׃ ⁴³ חנן בן מעכה ויושׁפט המתני׃ ⁴⁴ עזיא העשׁתרתי שׁמע ויעואל בני חותם הערערי׃ ⁴⁵ ידיעאל בן שׁמרי ויחא אחיו התיצי׃ ⁴⁶ אליאל המחוים ויריבי ויושׁויה בני אלנעם ויתמה המואבי׃ ⁴⁷ אליאל ועובד ויעשׂיאל המצביה׃